ஜேவிபி பொதுச் செயலாளர் ரில்வின் சில்வா தலைமையிலான ஐந்து பேர் கொண்ட குழு, பாரதீய ஜனதா கட்சியின் அழைப்பின் பேரில் இன்று புதுடெல்லிக்குப் பயணம் மேற்கொள்கிறது.

இன்று முதல் ஓக்டோபர் 1 ஆம் நாள் வரை ஜேவிபி குழுவினர் இந்தியாவில் பயணம் மேற்கொள்ளவுள்ளதாக பாஜக அறிவித்துள்ளது.

பாஜக-ஜேவிபி உறவுகளை வலுப்படுத்துவது, அமைப்பு ரீதியான அனுபவங்களைப் பரிமாறிக்கொள்ள வழிவகுப்பது மற்றும் இரு அரசியல் கட்சிகளுக்கும் இடையிலான உறவுகளை மேலும் ஆழப்படுத்துவதே இந்தப் பயணத்தின் நோக்கம்,  என்று பாஜகவின்,  வெளியுறவு  பொறுப்பாளர் விஜய் சௌதைவாலே வெளியிட்டுள்ள அறிக்கையில் தெரிவிக்கப்பட்டுள்ளது.

ரில்வின் சில்வா தலைமையிலான, ஜேவிபி குழுவில் சந்திரிகா அதிகாரி (மத்திய குழு உறுப்பினர்), அபுபக்கர் ஆதம்பாவா (நாடாளுமன்ற உறுப்பினர்), கபிலன் சுந்தரமூர்த்தி (மாவட்டக் குழு உறுப்பினர்) மற்றும் கல்பனா மதுபாஷினி (சர்வதேச விவகார உறுப்பினர்) ஆகியோரும் அடங்குகின்றனர்.

இந்தக் குழு, பாஜக தலைவர் நிதின் நபின், பொதுச் செயலாளர்  பி. எல். சந்தோஷ் மற்றும் ஏனைய மூத்த பாஜக தலைவர்களைச் சந்திக்க உள்ளது.

அத்துடன், இந்திய வெளியுறவு அமைச்சர் எஸ். ஜெய்சங்கர் மற்றும் டெல்லி முதலமைச்சர் ரேகா குப்தா ஆகியோருடனும்,  ஜேவிபி குழுவினர் கலந்துரையாடல்கள் நடத்தவுள்ளனர்.

பாஜக தலைமையகத்தில் உள்ள பல்வேறு பாஜக அணிகள் மற்றும் துறைகளுடன்  கலந்துரையாடல்களை நடத்தவுள்ள ஜேவிபி குழுவினர், நாடாளுமன்றம் மற்றும் டெல்லி பாஜக மாநில அலுவலகத்திற்கும் செல்வார்கள் என்றும்  தெரிவிக்கப்பட்டுள்ளது.