1979-ஆம் ஆண்டின் 48-ஆம் இலக்க பயங்கரவாதத் தடுப்பு சட்டத்தை ரத்து செய்து, அதனை பதிலீடு செய்யும் வகையிலான,  பயங்கரவாதத்திலிருந்து அரசைப் பாதுகாக்கும் புதிய சட்டமூலத்தை சிறிலங்கா  அரசாங்கம் அரசிதழில் வெளியிட்டுள்ளது.

செப்ரெம்பர் 18 ஆம் நாளிட்ட அரசிதழ் இணைப்பில் பிரசுரிக்கப்பட்டு, செப்ரெம்பர் 22 ஆம் நாள்  வெளியிடப்பட்ட இந்த சட்டமூலம்-  நாட்டிற்கு உள்ளேயோ அல்லது வெளியேயோ நிகழ்த்தப்படும் பயங்கரவாதச் செயல்களிலிருந்து சிறிலங்காவின் தேசியப் பாதுகாப்பையும் பொதுமக்களையும் பாதுகாப்பதையும், வெளிநாடுகளில் பயங்கரவாத நடவடிக்கைகளுக்குத் தயாராவதற்கு சிறிலங்காவின் நிலப்பரப்பு பயன்படுத்தப்படுவதைத் தடுப்பதையும், பயங்கரவாதம் தொடர்பான குற்றங்களில் ஈடுபடும் நபர்களை அடையாளம் காணுதல், கைது செய்தல், தடுப்புக்காவல், விசாரணை செய்தல், வழக்குத் தொடருதல் மற்றும் தண்டித்தல் ஆகியவற்றுக்கு வழிவகை செய்வதை  நோக்கமாகக் கொண்டுள்ளது என்று குறிப்பிடப்பட்டுள்ளது.

முன்மொழியப்பட்ட இந்தச் சட்டத்தின் கீழ், சிறிலங்கா குடிமக்களால் சிறிலங்காவுக்கு உள்ளேயும் வெளியேயும் செய்யப்படும் குற்றங்களுக்கும், வெளிநாடுகளில் உள்ள சிறிலங்கா குடிமக்கள், தூதரகங்கள் மற்றும் அரசிற்குச் சொந்தமான சொத்துக்களுக்கு எதிராகச் செய்யப்படும் செயல்களுக்கும் இந்த ஏற்பாடுகள் பொருந்தும்.

பொதுமக்களிடையே பீதியைத் தூண்டும் நோக்கத்திலோ அல்லது ஒரு அரசியல் அல்லது சித்தாந்த நோக்கத்தை முன்னெடுத்துச் செல்வதற்காக, ஒரு அரசாங்கத்தையோ அல்லது அனைத்துலக அமைப்பையோ செயற்படவோ அல்லது செயற்படாமல் இருக்கவோ கட்டாயப்படுத்தும் நோக்கத்திலோ, வேண்டுமென்றே அல்லது தெரிந்தே செய்யப்படும் செயல்களையே பயங்கரவாதம் என இந்த சட்டமூலத்தை வரையறுக்கிறது.

இத்தகைய செயல்களில்- மரணத்தை ஏற்படுத்துதல், கடுமையான காயம் விளைவித்தல், பணயக்கைதிகளைப் பிடித்தல், பொது உள்கட்டமைப்பிற்கு கடுமையான சேதம் விளைவித்தல், பெரும் சுற்றுச்சூழல் பாதிப்பு, முக்கிய அமைப்புகள் மீதான இணையவழித் தாக்குதல்கள் மற்றும் அனைத்துலக பயங்கரவாத எதிர்ப்பு உடன்பாடுகளின் கீழ் வரும் நடத்தைகள் ஆகியவை அடங்கும்.

மரணத்தை விளைவிக்கும் பயங்கரவாதச் செயல்களில் குற்றவாளியாகக் கருதப்படும் ஒருவருக்கு ஆயுள் தண்டனை விதிக்கப்படலாம்.

அதே சமயம் பயங்கரவாதம் தொடர்பான பிற குற்றங்களுக்கு 20 ஆண்டுகள் வரை சிறைத் தண்டனையும், ரூ. 2 கோடி வரை அபராதமும் விதிக்கப்படலாம்.

முன்மொழியப்பட்ட இந்தச் சட்டம், பயங்கரவாதச் செயல்களைச் செய்வதற்கான முயற்சிகள், சதித்திட்டங்கள் மற்றும் தயாரிப்புகளையும் குற்றமாக்குகிறது.

தடைசெய்யப்பட்ட அமைப்புகளில் ஆள்சேர்ப்பு, நிதியளித்தல், பயிற்சி, தளவாட ஆதரவு அல்லது நடவடிக்கைகளில் பங்கேற்பதன் மூலம் ஈடுபட்டதாகக் குற்றவாளியாகக் கண்டறியப்படும் நபர்களுக்கு 15 ஆண்டுகள் வரை சிறைத் தண்டனையும், ரூ. 1 கோடி வரை அபராதமும் விதிக்கப்படலாம்.

பயங்கரவாத சந்தேக நபர்களுக்கு அடைக்கலம் கொடுப்பது, குற்றவாளிகளுக்கு உதவுவது, பயங்கரவாதக் குற்றங்கள் தொடர்பான தகவல்களை மறைப்பது மற்றும் பயங்கரவாதத்தை ஊக்குவிக்கும் நோக்கம் கொண்ட பயங்கரவாத வெளியீடுகள் அல்லது பொருட்களைப் பரப்புவது ஆகியவற்றை இந்த சட்டமூலம் குற்றமாக்குகிறது.

அதே நேரத்தில், அடிப்படை சுதந்திரங்களைப் பாதுகாப்பதை நோக்கமாகக் கொண்ட விதிகளை இந்த சட்ட வரைவு உள்ளடக்கியுள்ளது.

போராட்டங்கள், வேலைநிறுத்தங்கள், தொழிற்சங்க நடவடிக்கைகள், வாதாடுதல், எதிர்ப்பு மற்றும் மனிதாபிமான நடவடிக்கைகளில் பங்கேற்பது மட்டும் பயங்கரவாதக் குற்றங்களாக ஆகாது என்று அது வெளிப்படையாகக் கூறுகிறது.

மேலும், பத்திரிகை, கல்வி மற்றும் அறிவியல் ஆராய்ச்சி, குடிமைச் சமூக நடவடிக்கைகள், சட்டப் பிரதிநிதித்துவம், கலை வெளிப்பாடு, நையாண்டி, அரசியல் விமர்சனம் மற்றும் கருத்துக்கள் அல்லது எதிர்ப்பின் அமைதியான வெளிப்பாடு போன்ற நடவடிக்கைகள் வேண்டுமென்றே பயங்கரவாதத்தைத் தூண்டாத வரையில், அவற்றுக்கும் இந்த சட்டமூலத்தை பாதுகாப்புகளை வழங்குகிறது.

கைதுகள், சோதனைகள் மற்றும் விசாரணைகளை நிர்வகிக்கும் விரிவான விதிகளை இந்தச் சட்டம் கொண்டுள்ளது.

சந்தேக நபர்களுக்கு அவர்களின் கைதுக்கான காரணங்கள் மற்றும் சட்டப் பிரதிநிதித்துவத்திற்கான அவர்களின் உரிமை குறித்துத் தெரிவிக்கப்பட வேண்டும், அதே நேரத்தில் கைது செய்யப்பட்டதற்கான அறிவிப்பு நெருங்கிய உறவினர்களுக்கும் சிறிலங்கா மனித உரிமைகள் ஆணைக்குழுவிற்கும் வழங்கப்பட வேண்டும்.

இந்த சட்டமூலத்தின்  கீழ், ஒரு சந்தேக நபர் பொதுவாக கைது செய்யப்பட்ட 48 மணி நேரத்திற்குள் ஒரு நீதித்துறை நடுவர் முன் நிறுத்தப்பட வேண்டும்.

இருப்பினும், விசாரணைகளுக்காக மேலும் தடுப்புக்காவல் அவசியம் எனக் கருதப்படும் பட்சத்தில், காவல்துறை தலைமை ஆய்வாளர் அல்லது அங்கீகரிக்கப்பட்ட துணைத் தலைமை ஆய்வாளரின் விண்ணப்பத்தின் பேரில், சம்பந்தப்பட்ட அமைச்சின் செயலாளரால் தடுப்புக்காவல் உத்தரவுகள் பிறப்பிக்கப்படலாம்.

ஒவ்வொரு தடுப்புக்காவல் உத்தரவும் ஒரு நேரத்தில் இரண்டு மாதங்கள் வரை நடைமுறையில் இருக்கலாம், அதே சமயம், ஆரம்ப தடுப்புக்காவல் உத்தரவு பிறப்பிக்கப்பட்ட நாளில் இருந்து மொத்த தடுப்புக்காவல் காலம் ஓராண்டிற்கு  மிகாமல் இருக்க வேண்டும்.

ஆரம்ப இரண்டு மாத காலத்திற்குப் பின்னர் செய்யப்படும் எந்தவொரு நீடிப்பிற்கும் உயர்நீதிமன்றத்தின் ஒப்புதல் தேவைப்படும்.

இந்த சட்டமூலம், ஓய்வுபெற்ற உயர்நீதிமன்ற அல்லது மேல்முறையீட்டு நீதிமன்ற நீதியரசர் மற்றும் சட்டம், மனித உரிமைகள், பொது நிர்வாகம் அல்லது தேசியப் பாதுகாப்பு ஆகியவற்றில் நிபுணத்துவம் பெற்ற மேலும் இரண்டு உறுப்பினர்களைக் கொண்ட ஒரு சுதந்திரமான மறுஆய்வுக் குழுவை நிறுவுவதையும் முன்மொழிகிறது.

இந்தக் குழு தடுப்புக்காவல் உத்தரவுகளை மறுஆய்வு செய்து, அவற்றை உறுதிப்படுத்த வேண்டுமா, திருத்த வேண்டுமா அல்லது ரத்து செய்ய வேண்டுமா என்பது குறித்து பரிந்துரைகளை வழங்கும்.

பல மேற்பார்வை வழிமுறைகளும் சேர்க்கப்பட்டுள்ளன.  அதன்படி, நீதிபதிகள், தடுத்து வைக்கப்பட்டவர்களின் நலனை அவ்வப்போது மறுஆய்வு செய்ய வேண்டும், அதே சமயம், அங்கீகரிக்கப்பட்ட தடுப்புக்காவல் இடங்கள் நீதிபதிகள் மற்றும் மனித உரிமைகள் ஆணையத்தின் அங்கீகரிக்கப்பட்ட அதிகாரிகளின் ஆய்வுகளுக்கு உட்படுத்தப்படும்.

சித்திரவதை அல்லது கொடூரமான, மனிதாபிமானமற்ற அல்லது இழிவுபடுத்தும் நடத்தை சந்தேகிக்கப்படும் இடங்களில் மருத்துவப் பரிசோதனைகளைக் கட்டாயமாக்கும் விதிகளையும் இந்த சட்டமூலத்தை கொண்டுள்ளது.

மேலும், முன்மொழியப்பட்ட சட்டத்தின் கீழ் தடுத்து வைக்கப்பட்டுள்ள சந்தேக நபர்கள், சட்டத்தால் விதிக்கப்பட்ட நிபந்தனைகளுக்கு உட்பட்டு, சட்டவாளர்கள், உறவினர்கள் மற்றும் பிற பார்வையாளர்களைச் சந்திக்க அனுமதிக்கப்படுவார்கள்; அதேவேளையில், விசாரணைகள் தேவையற்ற தாமதமின்றி முடிக்கப்பட வேண்டும் என்றும் கூறப்பட்டுள்ளது.