கடந்த சில வாரங்களில் இடம்பெற்ற விபத்துகளில் அதிகளவு சிறிலங்கா படையினர் கொல்லப்பட்டமை மற்றும், காயமடைந்தமை தொடர்பாக இராணுவ நீதிமன்ற விசாரணை நடத்தப்படவுள்ளது.

முல்லைத்தீவு, கிளிநொச்சி, அம்பாறை, வவுனியா, சூரியவெவ ஆகிய இடங்களில் ஜூன் 25ஆம் நாளுக்குப் பின்னர் இடம்பெற்ற விபத்துகளில், குறைந்தது 8 சிறிலங்கா இராணுவத்தினர் உயிரிழந்தனர். 30 படையினர் காயமடைந்தனர். இவர்களில் பலர் மோசமான காயங்களுக்கு உள்ளாகியுள்ளனர்.

கிளிநொச்சியில் தொடருந்து மோதிய விபத்தில், 6 படையினரும், முல்லைத்தீவு மற்றும் வவுனியாவில் தலா 1 படையினரும் விபத்துகளில் உயிரிழந்தனர்.

மேலும், ஒரு மேஜர் தர அதிகாரி உள்ளிட்ட 30இற்கும் அதிகமான படையினர் இந்தச் சம்பவங்களில் காயமடைந்தனர்.

இந்தச் சம்பவங்கள் தொடர்பாக இராணுவ நீதிமன்ற விசாரணை நடத்தப்படவுள்ளதாக இராணுவப் பேச்சாளர் பிரிகேடியர் சுமித் அத்தபத்து தெரிவித்தார்.