போர் முடிவுக்கு வந்துவிட்டதாக, சிறிலங்கா அதிபராக இருந்த மகிந்த ராஜபக்ச நாடாளுமன்றத்தில் அறிவித்த போது விடுதலைப் புலிகளின் தலைவர் வே.பிரபாகரன் உயிருடன் தான் இருந்தார், அதற்குப் பின்னரே அவரது சடலம் கண்டுபிடிக்கப்பட்டது என்று சிறிலங்கா அமைச்சர் பீல்ட் மார்ஷல் சரத் பொன்சேகா தெரிவித்தார்.

சிறிலங்கா நாடாளுமன்றத்தில் நேற்று உரையாற்றிய அவர்-

“எனது பெற்றோர்கள் ஆசிரியர்கள். நான் இராணுவத்தில் இணைந்து கொண்டேன். அதில் பெரும் பதவிகளை வகிக்க வேண்டுமென நான் இலக்குகளை கொண்டிருக்கவில்லை.

எனது பணிகளை சரியான முறையாக முன்னெடுக்க வேண்டுமென்பதையே இலக்காக கொண்டிருந்தேன். அதற்கமைய இராணுவத்தினரின் நற்பெயரை பாதுகாத்து அர்ப்பணிப்புடன் செயற்பட்டிருந்தேன்.

அவ்வாறான நிலையில் அமெரிக்கா போன்ற நாடுகளில் சுகபோக வாழ்க்கையை வாழ்ந்தவர்கள் போர் முடிந்த பின்னர் இராணுவத்தை முறையாக நடத்தவில்லை என்று என்மீது குற்றம் சாட்டுகிறார்கள்.

நான் நேர்மையாக முறையாக பதவி நியமனத்தைப் பெற்றிருக்கவில்லை என்று முன்னாள் அதிபர் மற்றும் பாதுகாப்புச் செயலர் ஆகியோர்,  கூறியுள்ளனர்.

எனது ஓய்வு வயதெல்லையை அடைந்தபோது உரிய வர்த்தமானி அறிவித்தல் வெளியிடப்பட்டு, நான் இராணுவத் தளபதியாக நியமிக்கபட்டதுடன், ஓய்வு பெறும் வயதெல்லையும் 60 வயதாக மாற்றப்பட்டது.  இதுதான் உண்மை நிலை.

என்னைப் பொறுத்தவரையில் வெளிநாடுகளின் தூதுவராக, பாதுகாப்பு செயலராக பதவி வகிக்க வேண்டும் என்ற எதிர்பார்ப்பைக் கொண்டிருக்கவில்லை. இராணுவத்தின் உயர்பதவியைக் கூட எண்ணியிருக்கவில்லை.

எனது கடமையை செவ்வனே செய்தேன். தாயைப்போல் தாய்நாட்டையும் நேசித்தேன். காலம் நிறைவடைந்தவுடன் ஓய்வுபெற்றுக் கொள்வதே நோக்கமாகவும் இருந்தது. அதற்கான சந்தர்ப்பங்களை கடந்த ஆட்சியாளர்கள் வழங்கியிருக்கவில்லை.

போர் உக்கிரமடைந்த போது இராணுவத்தளபாடங்கள் சீனாவிலிருந்து கொள்வனவு செய்யப்பட்டன. அதற்கான நிதி வழங்கப்படுவதாகக் கூறி கடன் அடிப்படையிலேயே அவை பெறப்பட்டன.

போரைக் காணரம் காட்டி பல மோசடிகள் இடம்பெற்றுள்ளன. போருக்காக 82 பில்லியன் ரூபாவே செலவிடப்பட்டுள்ளது.

அவர்கள் எவ்வாறு பொது நிதியை கொள்ளையிட்டார்கள் என்பதை கூறுகிறேன். நாங்கள் 130.மி.மீ பீரங்கிக் குண்டுகளைக் கப்பல்களில் இறக்குமதி செய்தோம்.

போர் தொடங்கிய காலத்தில் 130 மி.மீ பீரங்கிக் குண்டுகள் ஒவ்வொன்றினதும் விலை 150 டொலராகவே இருந்தது. இறுதி 15 ஆண்டுகளில் அதன் விலை 50 டொலர்கள் வரை தான் அதிகரித்தது.

ஆனால் போரின் போது, ஒவ்வொரு 130 மி.மீ குண்டுக்கும் 650 டொலரைச் செலுத்தியிருந்தார் பாதுகாப்புச் செயலர். இதனால் ஆயுதங்களைக் கொள்வனவு செய்வதற்கு இராணுவத்துக்கு நிதி இல்லாமல் போனது.

வெடிபொருட்கள் இல்லாததால் நான்கு மாதங்கள் வரை என்னால் போரை நடத்த முடியாதிருந்தது.

நாங்கள் பயன்படுத்திய பல்குழல் பீரங்கிகளை ஒரே தடவையில் 40 குண்டுகளை செலுத்துவோம். 40 குண்டுகளைச் சுட முடியாது போனால்,  நாம் எதிர்பார்க்கும் விளைவுகளை அடைய முடியாது.

எம்மிடம் நிதி இல்லாமல் போனதால், 2008 நடுப்பகுதியில், நாளொன்றுக்கு ஒரு தடவையே பல்குழல் பீரங்கிகளைப் பயன்படுத்தினோம்.

நான் தனிப்பட்ட முறையில் பாகிஸ்தான் இராணுவத்தளபதியுடன் தொடர்பு கொண்டு, பேசியதையடுத்து, 40 மில்லியன் டொலர் பெறுமதியான பல்குழல் பீரங்கிக் குண்டுகளை அவர் அனுப்பிவைத்தார். அதனை வைத்தே போரைத் தொடர்ந்தோம்.

இவ்வாறு பல நெருக்கடிகளை எதிர்கொண்டு- சவால்களுக்கு முகம்கொடுத்தே போரை முன்னெடுத்திருந்தோம். ஆனால் அந்த போரைக் காரணம் காட்டி மோசடிகளை அவர்கள் செய்தனர்.

2005, 2010 ஆம் ஆண்டு நடைபெற்ற அதிபர் தேர்தல்களில் மோசடிகள் இடம் பெற்றுள்ளன. 2005 ஆம் ஆண்டு விடுதலைப்புலிகளின் தலைவர் பிரபாகரனுக்கு நிதி வழங்கி,  ரணில் விக்கிரமசிங்கவை தோற்கடிப்பதற்கு மகிந்த ராஜபக்ச முயற்சித்தார்.

பசில் ராஜபக்சவுடன் நான் உரையாடிய போது, ரணில் விக்கிரமசிங்கவுக்கு தமிழ் மக்கள் வாக்களிப்பதை தடுப்பதற்கு 2 மில்லியன் அமெரிக்க டொலர்களை விடுதலைப்புலிகளுக்கு வழங்கியதாகக் கூறினார்.

அந்த நிதி விடுதலைப்புலிகளின் கடற்படைக்கு கப்பல்களை மலேசியாவிலிருந்து கொள்வனவு செய்வதற்காக வழங்கப்பட்டுள்ளதாகவும் கூறினார்.

இதன் போது மலையகத்தைச் சேர்ந்த அரசியல் தலைவர் ஒருவரும் எம்முடன் இருந்தார்.  அவரைப் பார்த்து உங்களுடைய மக்களையும் ரணில் விக்கிரமசிங்கவுக்கு வாக்களிப்பதற்கு அனுமதிக்க வேண்டாமென பிரபாகரன் கோரியுள்ளதாக பசில் ராஜபக்ச கூறினார்.

இவ்வாறு 2005 ஆம் ஆண்டு புலிகளுக்கு நிதி வழங்கியே தேர்தலில் வெற்றி பெற்றனர்.

அதேபோன்று 2010 ஆண்டு அதிபர் தேர்தலில் வாக்கெண்ணும் நிலையங்கள் மீது தாக்குதல்கள் நடத்தப்பட்டன. அப்போதைய தேர்தல்கள் ஆணையாளர் இது தொடர்பாக உண்மையைக் கூற முடியாது அச்சத்துடன் தற்போது வரையில் உள்ளார். 2005, 2010 தேர்தல்களி்ல் மோசடிகளை செய்தே வெற்றிபெற்றார்கள்.

2015 அதிபர் தேர்தலிலும் அவ்வாறான மோசடிகளை மேற்கொள்வதற்கு திட்டமிட்டிருந்தார்கள். அனைத்துலக கண்காணிப்பாளர்களின் பிரசன்னம் மற்றும் மக்களின் வெறுப்பால் அதனை மேற்கொள்ள முடியாது போனது.

இந்த தேர்தலில் போட்டியிட்ட மைத்திரிபால சிறிசேன தோல்வியடைந்திருந்தால் அவரை பழிதீர்க்கும் வகையில் சிறையில் அடைக்கும் திட்டங்களையும் வகுத்திருந்தார்கள்.  ஆனால் மக்கள் அதற்கு இடமளிக்கவில்லை.

65 இலட்சம் மக்கள் ஆணையை வழங்கி ராஜபக்சவின் குடும்ப ஆட்சியை அகற்றினார்கள். சர்வதிகாரத்திற்கு முற்றுப்புள்ளியை வைத்தார்கள்.

மாத்தறையின் மந்திரவாதியை வைத்து ஏதோ செய்வதற்கும் முனைந்திருந்தார்கள். அண்மைக்காலமாக எனது தொண்டை சரியில்லை. மந்திரவாதியின் செயற்பாடுகள் காரணமோ எனத் தெரியாது.

2010 ஆம் ஆண்டு தேர்தல் நிறைவடைந்ததும் என்னைக் கைது செய்தார்கள். இராணுவ நீதிமன்றத்தை அமைத்தார்கள். இராணுவ நீதிமன்றம் அமைக்கப்படும் போது என்னை விடவும் உயர்ந்த பதவிகளைக் கொண்ட அதிகாரிகளே நியமிக்கப்பட வேண்டும். மாறாக எனது பதவிநிலையிலும் குறைந்த அதிகாரிகளே விசாரணையாளர்களாக நியமிக்கப்பட்டார்கள்.

என்மீது கேள்விப்பத்திர முறைகேடு தொடர்பாகவே வழக்கு தாக்கல் செய்தார்கள். எனது மருமகன் மீது குற்றம்சாட்டினார்கள். இராணுவச் சட்டத்தின் பிரிவு 35 இன் பிரகாரம் என்மீது குற்றம் காணப்பட்டால் என்னை பதவி நிலை நீக்க முடியும். ஆனால் எனது பதவி நிலைகளை பறித்தார்கள்.

அதுமட்டுமன்றி எனக்கு எதிர்த்தரப்பில் முன்னிலையான சட்டத்தரணி, மாமனார் என்ற வகையில் தனுன திலகட்ணவின் செயற்பாடுகள் அனைத்தையும் அறிந்திருக்க வேண்டும் என்று வாதிட்டதை ஏற்று தீர்ப்பளித்தார்கள்.

அந்தச் சட்டத்தரணியும் உயர்நீதிமன்ற சட்டத்தரணியாக பதவியுயர்வு பெற்றார். இவ்வாறுதான் நீதித்துறையை அவர்கள் கையாண்டார்கள். இதற்காக வெட்கப்பட வேண்டும்.

அண்மையில் ஊடகங்களுக்கு கருத்து வெளியிட்ட பசில் ராஜபக்ச சரத்பொன்சேகா மட்டுமே அரசியல் பழிவாங்கல்களுக்கு உள்ளானதாக ஏற்றுக் கொண்டிருக்கிறார். நான் மட்டுமல்ல இராணுவத்தில் அர்ப்பணிப்பு மிக்க சேவையை வழங்கிய 35 மூத்த அதிகாரிகளைவீட்டுக்கு அனுப்பினார்கள்.

பத்து மேஜர் ஜெனரல்களும், பத்து பிரிகேடியர்களும் அவர்களில் உள்ளடங்குகின்றனர். அவர்களில் இருவர் தொழில்வாய்ப்புக்காக பல்வேறு இடங்களுக்கு சென்று மாரடைப்பால் உயிரிழந்து விட்டனர். இவ்வாறு திட்டமிட்ட பழிவாங்கல்கள் தொடர்ந்திருந்தன.

போர்  வெற்றியை முழுமையாகத் தாமே பெற்றுக் கொள்ள வேண்டும் என நினைத்தார்கள். இரு ஆண்டுகளும் ஒன்பது மாதங்களுமாக நான் தலைமையேற்று வழிநடத்திய  போரின் இறுதி மாதத்தில் என்னை மீள அழைத்தார்கள்.

24 மணி நேரமும் நான் பணியாற்றுவதால் சிரமங்களை எதிர்கொள்வதாக கூறிய கோத்தபாய ராஜபக்ச,  வன்னியில் கடமையாற்றிய இரண்டாம் நிலை அதிகாரியிடம் பொறுப்பை  ஒப்படைத்திருந்தார்.

அதற்கு அடுத்த வாரத்தில் போர்த்தளபாடங்களை கொள்வனவு செய்வதற்காக சீனாவுக்கு நான் சென்றிருந்தேன்.

விடுதலைப்புலிகள் கடலுக்கும் களப்புக்கும் இடையில் சிக்க வைக்கப்பட்டிருந்த அந்தத் தருணத்தில் மேஜர் ஜெனரல்களோ,  பிரிகேடியர்களோ போரை வழி நடத்த வேண்டிய அவசியம் ஏற்பட்டிருக்கவில்லை.  சாதாரண சார்ஜன்ட் ஒருவராலேயே யுத்தத்தை முன்னெடுத்திருக்க முடியும்.

மே 18 ஆம் நாள் வெளிநாட்டில் இருந்து திரும்பிய மகிந்த ராஜபக்ச மண்ணை முத்தமிட்டபோது புலிகளின் தலைவர் பிரபாகரன் இறந்திருக்கவில்லை.

போரில் வெற்றியைப் பெற்று விட்டதாக அவர் நாடாளுமன்றத்தில் அறிவித்த போது கூட பிரபாகரன் உயிருடன் தான் இருந்தார். அன்று, அதற்குப் பின்னரே பிரபாகரனின் சடலம் மீட்கப்பட்டது. போர் நிறைவடைந்த நாள் கூட ராஜபக்சவினருக்கு தெரியாது.

இரண்டு ஆண்டுகள் ஒன்பது மாதங்களாக சட்ட திட்டங்களுக்கு அமைவாக முன்னெடுத்துச் செல்லப்பட்டு போரை இறுதி தருணத்தில் சிக்கலுக்குள் உள்ளாகும் நிலைமை ஏற்படுத்தி விட்டார்கள்.

மோசமான முறையில் முன்னெடுக்கப்பட்டது, போர்க்குற்றங்கள் இடம்பெற்றுள்ளதாக விமர்சனங்கள் எழுவதற்கான நிலைமைகளை ஏற்படுத்தி விட்டார்கள்.

இதனால் தான் வெள்ளைக் கொடி சர்ச்சையும் எழுந்தது.  அது நடந்த போது நான் இங்கு இருக்கவில்லை.

ஆனால், போரின் இறுதித் தருணங்களில்  என்ன நடந்தது என்பது கண்டறியப்பட வேண்டும்.  வெள்ளைக்கொடி விவகாரத்தில் நடந்ததென்பது மக்களுக்கு தெரியப்படுத்தப்பட வேண்டும். பக்கச்சார்பற்ற நியாயமான விசாரணை முன்னெடுக்கப்பட வேண்டும்.

அனைத்துலக கண்காணிப்பாளர்களின் விசாரணையை முன்னெடுத்து இராணுவத்தின் மீது படிந்துள்ள கறையைப்  போக்க வேண்டும். இதிலிருந்து  விலகிச் செல்ல முடியாது.

1991 ஆம் ஆண்டு ரஞ்சன் விஜேரத்னவின் கால்களில் விழுந்து உயிர்த் தஞ்சம் கோரி அமெரிக்காவுக்கு ஓடினார்  கோத்தாபய.. அங்கு  வாகனத் திருத்துமிடம் ஒன்றில் தான் இரும்பு ஓட்டுனராக பணியாற்றினார்.

அப்போது, அவருடைய  மிதிவண்டியை ஏணியுடன் கட்டி வைத்திருந்தபோது இரண்டையும் யாரோ திருடிச் சென்றதால் நெருக்கடிகளுக்கு முகம்கொடுத்தாக கூறியிருக்கிறார்.

இவ்வாறு தப்பிச் சென்றவர்கள் இரண்டரை இலட்சம் இராணுவத்தினருக்கு கட்டளைகளை வழங்க முடியுமா? தொழில்வாண்மை இல்லாத இவர்கள் எவ்வாறு இராணுவத்தினரை வழி நடத்த முடியும்?

35 ஆண்டுகளாக இராணுவத்தில் சேவையாற்றியே கட்டளை இடும் தகுதியை நான் பெற்றிருந்தேன்.

இவ்வாறான நிலையில் இருந்தவரே போர்வெற்றியை தனதாக்க வேண்டும் என கங்கணம் கட்டி செயற்பட்டார்.

கராப்பிட்டிய மருத்துவமனையில் சிறந்த சத்திர சிகிச்சை நிபுணர் இருக்கின்றார். அவரின் சத்திர சிகிச்சைகள் வெற்றியளிக்கும் பட்சத்தில் சுகாதார அமைச்சரை பாராட்ட முடியாது.

அர்ஜுன ரணதுங்க உலக கிண்ணத்தை வெற்றி கொண்டு வந்தபோது நாட்டின் அதிபரைக் கௌரவிக்க முடியாது. அண்மையில் இலங்கை அணி தோல்வியுற்றதற்கு அமைச்சர் தயாசிறியை குற்றம்சாட்ட முடியாது.

களத்தில் இருந்து பணியாற்றுபவர்களுக்குக் கௌரவம் வழங்கப்பட வேண்டும். அதற்கு மாறாக சர்வாதிகாரத்துடன் தாம் கௌரவத்தைப் பெற்றுக் கொள்ள வேண்டுமென்பதில் உறுதியாக இருந்தார்கள். அதனைப் பயன்படுத்தி இந்த நாட்டின் மன்னர் ஆட்சியை நிலை நிறுத்தி குடும்பாதிக்கத்தை வலுப்படுத்த முனைந்தார்கள்.

ஆனால் அனைத்துமே தலைகீழாக மாறியுள்ளன. ஆட்சியில் பலமும் அதிகாரமும் தொடர்ந்து இருக்குமென கருதினார்கள். இன்பமும் துன்பமும் வண்டியின் சக்கரங்கள் என்பதை மறந்துவிட்டார்கள். மக்கள் பீதியுடன் வாழ முடியாது என்பதை உணர்ந்து ஆட்சி மாற்றத்தை ஏற்படுத்தியுள்ளார்கள். தற்போது அவர்கள் அரசியல் அநாதைகளாகி விட்டனர்.

எமது நாட்டின் பொருளாதாரம் இன்று பாரிய நெருக்கடியில் உள்ளதற்கு கடந்த ஆட்சியாளர்களே காரணம். சீனாவிடமிருந்து எமது பொருளாதாரத்தை முன்னெடுப்பதாக கூறியபோதும் அதனை சூறையாடி உள்ளனர்.

ஒரு டொலர் களவாடியிருந்தாலும் கழுத்தை வெட்டிக் கொள்வதாக மகிந்த ராஜபக்ச கூறியிருந்தார். ஒரு டொலர் அல்ல 90 மில்லியன் ரூபாவை களவாடியுள்ளார்கள்.

ராடா நிறுவனத்தின் ஊடாக எமில்காந்தனுக்கு வழங்கியுள்ளார்கள். அதற்கான சாட்சிகளை அவர் விரைவில் முன்வைப்பார் . பீகொக் மாளிகையை வேறொருவரின் பெயரில் பதிவு செய்துள்ளார்கள். சுனாமி நிதியில் மகிந்த ராஜபக்ச மோசடிகளை மேற்கொண்டிருந்தார். அவரை விடுதலையளித்தது உதவியதாக எனது தேர்தல் மேடையில் சரத் என் சில்வா பகிரங்கமாகவே தெரிவித்திருக்கிறார்.

இவற்றை விட விகாரைகளின் கப்பம் பெற்றுள்ளார்கள். பல பில்லியன்களை வங்கிகளில் வைப்பிலிட்டுள்ளார்கள். சில் ஆடைகளை 50 ரூபாவிற்கு இறக்குமதி செய்து 250 ரூபாவாக விலை பதித்துள்ளார்கள். இவ்வாறான செயற்பாடுகளை மேற்கொண்டவர்கள் வயிற்றை அல்லது கழுத்தை அறுத்துக்கொள்ள வேண்டும். ஆனால் அவை நிரூபிக்கப்பட்டு தண்டனை வழங்குவதற்கு காத்திருப்பது அவசியம்.

இவற்றை விட 137 கிலோ  தங்கம் இறுதிப் போரில் கைப்பற்றப்பட்டதாக பதிவுகள் உள்ளன. அது தவறானது. போர் முடிந்த பின்னர், 220 கிலோ தங்கத்தை நான் அனுப்பியிருந்தேன்.

அவற்றின் உரிமையாளர்களின் பெயரும் அதில் காணப்பட்டது. இரு வாரங்களின் பின்னர்,  நான் அந்த களத்திலிருந்து விலகியிருந்த நிலையில் 400 முதல் 500 வரையிலான கிலோ தங்கம் மீட்கப்பட்டிருந்தது.

தேசத்தை அழிக்க முனைந்தவர்கள் இன்று ஆட்சியதிகாரமற்று நெருக்கடிகளுடன் இருக்கின்றார்கள். தம்மை பழிவாங்குவதாக கூறுகிறார்கள்.

அன்று நான் கைது செய்யப்பட்டு சிறையில் அடைக்கப்பட்டேன். எனது மனைவி நள்ளிரவு பன்னிரண்டு மணிக்கு குற்றப் புலனாய்வுப் பிரிவுக்கு அழைத்துச் செல்லப்பட்டார். எனது பிள்ளைகள் விமான நிலையத்தில் தடுத்து வைக்கப்பட்டார்கள். மருமகன் 5 ஆண்டுகளாக மறைந்து வாழ்ந்தார். இவை பழிவாங்கல்கள்.

தற்போது குற்றச்சாட்டுக்கள் முன்வைக்கப்பட்டு கைதுகள் இடம்பெறுகின்றபோது பிள்ளைகளைத் தண்டிக்காதீர்கள் தன்னை கைது செய்யுங்கள் என கண்ணீர் வடிக்கின்றனர். சாட்சியளிப்பதற்கு நீதிபதிகளின் வாயில்கள் ஊடாக வருகை தந்தவர்கள் இன்று நீதிமன்ற வளாகத்தில் தனித்து நின்று வழக்குகளுக்காக காத்திருக்கிறார்கள்.

யாரும் பழிவாங்கப்பட வேண்டுமென்பது எமது நோக்கமல்ல. உண்மைகள் கண்டறியப்பட்ட வேண்டும். லசந்த, தாஜுதீன், ரவிராஜ், எக்னெலிகொட ஆகியவர்களின் மரணங்கள் காணாமல் போதல் சம்பவங்களுடன் தொடர்புபட்டதாக சந்தேகங்களும் சாட்சியங்கள் தொடர்பான தகவல்களும் வெளியாகின்றன.

அன்றைய ஆட்சியாளர்களுக்கு தெரியாது எவ்விதமான நடவடிக்கைகளையும் முன்னெடுக்கப்பட்டிருக்கமாட்டாது.

இந்தச்சம்பவங்கள் அனைத்தும் ஒரு நபருடனேயே தொடர்புபட்டுள்ளது. குழுவொன்றே மேற்கொண்டுள்ளது. லசந்தவின் விடயத்தில் என் மீது குற்றச்சாட்டு முன்வைக்கப்படுகிறது. அது தவறானது. புனையப்பட்டது.

ஆகவே அவ்விடயங்கள் தொடர்பாக வெளிப்படைத்தன்மையுடன் விசாரணைகள் முன்னெடுக்கப்பட்டு உண்மைகள் கண்டறியப்பட்டு தண்டனைகள் வழங்கப்பட வேண்டும்.

தற்போது மகிந்த ராஜபக்சவை ஆதரித்துக் கொண்டு கோத்தாபய ராஜபக்சவின் தலைமையில் அரசியல் கட்சியை ஏற்படுத்தி ஆட்சியை அமைக்கலாம் என ஒரு தரப்பினர் கருதுகின்றனர். ஆனால் அது இயலாத காரியம்.

இரவில் விழுந்த குழியில் பகலில் விழுவதற்கு  முனையாதீர்கள். நாட்டின் எதிர்கால சுபீட்சத்திற்காக ஒன்றிணைந்து செயற்படுங்கள்” என்றும் அவர் தெரிவித்தார்.