சிறிலங்காவுக்கு அருகிலுள்ள அனைத்துலக கடல் பகுதியில் நிறுத்தப்பட்டுள்ள ஈரானிய கப்பல்களுக்கு பொருட்களை வழங்குவது தொடர்பாக, சிறிலங்காவுக்கு அமெரிக்கா அழுத்தம் கொடுத்ததாகக் கூறப்படும் குற்றச்சாட்டுகளை சிறிலங்கா வெளிவிவகார அமைச்சர் விஜித ஹேரத் மறுத்துள்ளார்.

சிறிலங்காவின் மூலோபாய முக்கியத்துவம் வாய்ந்த புவியியல் அமைப்பின் காரணமாக, ஏராளமான அனைத்துலக கப்பல்கள் நாட்டின் கடல் பகுதிக்கு அருகிலுள்ள கடல்வழிப் பாதைகளைத் தொடர்ந்து பயன்படுத்துகின்றன.

தேவைப்படும்போது கப்பல்களுக்குத் தேவையான ஒத்துழைப்பும் தளபாட ஆதரவும் வழங்கப்படுகின்றன.

ஹோர்முஸ் நீரிணையில் நிலவும் சூழ்நிலையால் ஏற்படும் வழிசெலுத்தல் தொடர்பான சவால்களின் காரணமாக, தற்போது சுமார் 47 கப்பல்கள் சிறிலங்காவின் 12 கடல் மைல் எல்லைக்குட்பட்ட பிராந்திய கடல் பகுதிக்கு வெளியே- அனைத்துலக கடல் பகுதியில் நிறுத்தப்பட்டுள்ளன.

இவற்றில், சுமார் 19 கப்பல்கள் நீண்ட காலமாக இந்தப் பகுதியில் இயங்கி வரும் ஈரானிய கப்பல்களாகும்.

இந்தக் கப்பல்கள் தொடர்பாக அமெரிக்கா, சிறிலங்கா அரசாங்கத்திற்கு எந்த உத்தரவுகளையும் பிறப்பிக்கவில்லை அல்லது அழுத்தம் கொடுக்கவில்லை.

வெளிநாட்டு அழுத்தங்களுக்கு சிறிலங்கா அடிபணியாது, தனது முடிவெடுக்கும் செயற்பாடுகளில் தனது இறையாண்மை, சுதந்திரம் மற்றும் தேசிய அடையாளத்தைத் தொடர்ந்து பாதுகாக்கும்.

மனிதாபிமானத் தேவைகளைப் பொறுப்புடன் பூர்த்தி செய்து, அனைத்துலக கடல்சார் சட்டத்தைக் கடைப்பிடித்து, அரசாங்கம் ஒரு நடுநிலையான வெளியுறவுக் கொள்கையைப் பின்பற்றி வருகிறது.

அனைத்துலக தடைகளுக்கு உட்பட்ட கப்பல்களுக்கு சிறிலங்கா அரசாங்கம் எந்தப் பொருட்களையும் அல்லது உணவுப் பொருட்களையும் வழங்கவில்லை.

அமெரிக்கா தடைகளை விதித்திருந்தால், ஒரு அரசாங்கமாக, நாங்கள் அந்தத் தடைசெய்யப்பட்ட கப்பல்களுக்குப் பொருட்களைக் கொண்டு செல்லவோ அல்லது உணவுப் பொருட்களை வழங்கவோ இல்லை.

குறிப்பிட்ட தனியார் துறை நபர்கள் அத்தகைய பல்வேறு கப்பல்களுக்குப் பொருட்களையும் சேவைகளையும் வழங்கினால், நிலவும் சூழ்நிலையைப் புரிந்து கொண்டு பொறுப்புடன் செயல்படுவது அவர்களின் பொறுப்பாகும்.

ஒரு அரசாங்கமாக, நாங்கள் அனைத்துலக கடல்சார் சட்டத்திற்கு இணங்கவே செயல்படுகிறோம்.”என்றும், சிறிலங்கா வெளிவிவகார அமைச்சர் விஜித ஹேரத் தெரிவித்துள்ளார்.