சிறிலங்காவின் மிகப்பெரிய வர்த்தகப் பங்காளியாக இந்தியாவே நீடிப்பதாக இந்தியத் தூதுவர் சந்தோஷ் ஜா உறுதிப்படுத்தியுள்ளார்.

சிறிலங்காவின் முதன்மையான வர்த்தகப் பங்காளியாக சீனா மாறிவிட்டது என்று இந்தியாவில் உள்ள சீனத் தூதரகத்தின்  பேச்சாளர் யூ ஜிங் எக்ஸ் தளத்தில் பதிவிட்டிருந்தார்.

2025-ஆம் ஆண்டில் சீனா-சிறிலங்கா வர்த்தகம் 5.5 பில்லியன் அமெரிக்க டொலர்களை எட்டியுள்ளதாக சிறிலங்கா மத்திய வங்கியின் தரவுகளை மேற்கோள்காட்டி அவர் அந்தப் பதிவில் கூறியிருந்தார்.

இந்த நிலையில், 2025-ஆம் ஆண்டில் இந்தியா-சிறிலங்கா இருதரப்பு வர்த்தகப் பரிவர்த்தனை 6.4 பில்லியன் அமெரிக்க டொலர்களை எட்டியுள்ளதாக, இந்திய வர்த்தகத் திணைக்களத்தின் வர்த்தகப் புள்ளிவிவரங்களைப் பகிர்ந்து, சிறிலங்காவிற்கான இந்திய தூதுவர் சந்தோஷ் ஜா தெரிவித்துள்ளார்.

அவர் பகிர்ந்துள்ள புள்ளிவிவரங்களின்படி, இந்தியாவுக்கான சிறிலங்காவின்  ஏற்றுமதி 2020-ஆம் ஆண்டில் 689 மில்லியன் டொலர்களிலிருந்து 2025-ஆம் ஆண்டில் 1.53 பில்லியன் அமெரிக்க டொலர்களாக அதிகரித்துள்ளது.

அதே நேரத்தில், கடந்த ஆண்டு மொத்த இருதரப்பு வர்த்தகம் 6.407 பில்லியன் அமெரிக்க டொலர்களாக இருந்தது.

சிறிலங்கா ஏற்றுமதிகளுக்கு இந்தியா தற்போது இரண்டாவது பெரிய இலக்காக உள்ளது என்றும், 2000-ஆம் ஆண்டில் இந்திய-சிறிலங்கா சுதந்திர வர்த்தக உடன்பாடு நடைமுறைக்கு வந்ததிலிருந்து சிறிலங்காவில் இருந்து  இந்தியாவிற்கான ஏற்றுமதி 30 மடங்குக்கும் மேலாக அதிகரித்துள்ளது என்றும் சந்தோஷ் ஜா தெரிவித்துள்ளார்.