‘கறுப்பு ஜூலை’ சம்பவங்களை விசாரிப்பதற்கு அதிபர் ஆணைக்குழுவை அமைப்பதை விட, நாடாளுமன்ற தெரிவுக் குழுவை  அமைப்பதே, பயனுள்ளதாக இருக்கும் என்று சிறிலங்காவின் நீதி மற்றும் தேசிய ஒருமைப்பாட்டு அமைச்சர் ஹர்ஷன நாணயக்கார தெரிவித்தார்.

1983-ஆம் ஆண்டு ‘கறுப்பு ஜூலை’ இன வன்முறைகள் குறித்து அதிபர் விசாரணை ஆணைக்குழுவை நியமிக்கக் கோரி, ஜனநாயகத் தமிழ் தேசியக் கூட்டணியின் நாடாளுமன்ற உறுப்பினர் செல்வம் அடைக்கலநாதன், நேற்று சிறிலங்கா நாடாளுமன்றத்தில் கொண்டு வந்த தனிநபர் தீர்மானத்தின் மீதான விவாதத்தின் மீது உரையாற்றிய போதே அவர் இதனைக் குறிப்பிட்டார்.

தேர்ந்தெடுக்கப்பட்ட பிரதிநிதிகளின் பங்கேற்புடன் கூடிய ஒரு தெரிவுக் குழு, சிறந்த முடிவுகளை எட்டுவதற்கு நமக்கு உதவும்.

சத்தியத்தையும் நல்லிணக்கத்தையும் வளர்ப்பதில் அது முக்கியப் பங்காற்றும்.

இந்த நாட்டில் யாரும் ‘சிறுபான்மையினர்’ அல்ல. இனம் அல்லது பிறப்பின் அடிப்படையில் தனிநபர்களைச் சிறுபான்மையினர் என்று முத்திரை குத்துவது மனிதாபிமானக் கொள்கைகளுக்கு முரணானது.

1948 பிப்ரவரி 4 ஆம் நாள் சுதந்திரம் பெற்றபோது, ​​இனப் பிரதிநிதித்துவம் தொடர்பான பிரச்சினைகள் தீர்க்கப்படாமல் இருந்தன.

1949-ல் குடியுரிமைச் சட்டம் இயற்றப்பட்டதன் விளைவாக, சிறிலங்காவில் வசித்து வந்த இலட்சக்கணக்கான தமிழர்கள் நாடு கடத்தப்பட்டனர் மற்றும் அவர்களின் குடியுரிமை பறிக்கப்பட்டது.

இந்தப் பிரச்சினையின் பின்விளைவுகள் இன்றுவரை உணரப்பட்டு வருகின்றன.

1956-ல் அறிமுகப்படுத்தப்பட்ட ‘சிங்களம் மட்டும்’ சட்டம், அதன் பின்னரான அனைத்துப் பிரச்சினைகளுக்கும் மூல காரணமாக அமைந்தது.

1957-ஆம் ஆண்டின் பண்டாரநாயக்க-செல்வநாயகம்  உடன்பாடு, பிராந்திய சபைகள் மூலம் அதிகாரப் பகிர்வை முன்மொழிந்தது; இருப்பினும், சிங்கள தேசியவாதத்தின் கடுமையான எதிர்ப்பின் காரணமாக, அந்த உடன்பாடு இறுதியில் கைவிடப்பட்டது.

சுதந்திரத்திற்குப் பிந்தைய காலத்தில் செய்யப்பட்ட தவறுகளின் விளைவுகளைத் தமிழ் மக்கள் அனுபவித்தனர்.

1979-ல் பயங்கரவாதத் தடுப்புச் சட்டம் இயற்றப்பட்டது, அதன் பின்னர், யாழ்ப்பாணப் பொது நூலகம் எரிக்கப்பட்டது. 1983-ல் ‘கறுப்பு ஜூலை’ கலவரங்கள் வெடித்தன, இது எண்ணற்ற பின்விளைவுகளுக்கு வழிவகுத்தது.“ என்றும் அமைச்சர் ஹர்ஷண நாணயக்கார தெரிவித்தார்.