உலக சந்தையில் எரிபொருள் விலைகள் கடுமையாக உயர்ந்த நிலையில், டீசலுக்கு ஒரு லீற்றருக்கு 70 ரூபா மானியம் வழங்கப்பட்ட நிலையிலும்,  தொடர்ந்து நட்டத்தைச் சந்தித்து வருவதாக சிறிலங்கா பெட்ரோலியக் கூட்டுத்தாபனத்தின் தலைவர் டி.ஜே. ராஜகருண தெரிவித்தார்.

கொழும்பில் நேற்று நடைபெற்ற சிறப்பு ஊடகவியலாளர் சந்திப்பில்  அவர் இதனைக் குறிப்பிட்டார்.

உலகளவில் மசகு எண்ணெய் மற்றும் சுத்திகரிக்கப்பட்ட எண்ணெய் விலைகள் மிக வேகமாக உயர்ந்ததன் காரணமாக, உள்நாட்டு எரிபொருள் விலைகளை மாற்றியமைப்பது தவிர்க்க முடியாததாகி விட்டது.

மத்திய கிழக்கில் நிலவும் நெருக்கடி மற்றும் ரஷ்யா-உக்ரைன் போர் ஆகியவை உலகளாவிய எண்ணெய் விலைகளின் அசாதாரண உயர்வுக்கு முக்கிய காரணங்களாக அமைந்தன.

பெப்ரவரி மாதத்துடன் ஒப்பிடுகையில், உலக சந்தையில் ஒரு பீப்பாய் பெட்ரோலின் விலை 75 டொலரிலிருந்து 136 டொலராகவும், ஒரு பீப்பாய் டீசலின் விலை 88 டொலரிலிருந்து 170 டொலராகவும் உயர்ந்துள்ளது.

பெட்ரோலியக் கூட்டுத்தாபனம் கொள்முதல் செய்யும் ‘முர்பான்’ (Murban) ரக மசகு எண்ணெயின் ஒரு பீப்பாய் விலை 69 டொலரிலிருந்து 115 டொலராக அதிகரித்துள்ளது.

உலக சந்தை விலைகள் இவ்வாறாக உயர்ந்த போதிலும், உள்நாட்டு சந்தையில் விலைகளை உடனடியாக உயர்த்தாமல் நுகர்வோருக்கு அதிகபட்ச நிவாரணம் வழங்க அரசாங்கமும் கூட்டுத்தாபனமும் நடவடிக்கை எடுத்துள்ளன.

பல நாடுகளில் எரிபொருள் விலைகள் கடுமையாக உயர்ந்துள்ளன. தற்போது ஒரு லீற்றர் டீசலின் உலகளாவிய சராசரி விலை 538 ரூபாவைத் தாண்டியுள்ளது.

பொதுமக்கள் மீதான சுமையைக் குறைப்பதற்காக, அடுத்த மூன்று மாதங்களுக்கு 41 பில்லியன் ரூபாவை மானிமாக அரசாங்கம் ஒதுக்கியுள்ளது; இதன் மூலம் டீசல் ஒரு லீற்றருக்கு 70 ரூபா மானியம் வழங்கப்பட்டுள்ளது.

தற்போதைய சந்தை விலைகளின்படி, ஒரு லீற்றர் டீசலின் அடக்கவிலை 528 ரூபாவாக உள்ளது. இருப்பினும், அதை 392 ரூபாவுக்கு விற்பனை செய்வதால் ஒரு லீற்றருக்கு 136 ரூபா நட்டம் ஏற்படுகிறது.

அரசாங்கத்தின் 70 ரூபா மானியத்தையும் கணக்கில் கொண்டாலும், டீசல் ஒரு லீற்றருக்கு 66 ரூபா நட்டத்தை பெட்ரோலியக் கூட்டுத்தாபனம் தொடர்ந்து எதிர்கொண்டு வருகிறது.

மேலும், ஒரு லீற்றர் பெட்ரோலுக்கு 52 ரூபாவும், ஒரு லீற்றர் சூப்பர் டீசலுக்கு 53 ரூபாவும் இழப்பை நிறுவனம் சந்தித்தது.

விமான எரிபொருள், கப்பல் எரிபொருள் விநியோகம் மற்றும் சுத்திகரிப்பு நிலைய செயல்பாடுகள் மூலம் கிடைக்கும் இலாபத்தைக் கொண்டு இந்த இழப்புகளைச் சமாளிக்க முயற்சிக்கிறோம்.

எரிபொருள் சந்தையில் செயல்படும் தனியார் நிறுவனங்கள் போட்டித்தன்மையுள்ள விலையில் எரிபொருளைக் கொள்முதல் செய்யத் தவறியதாலும், கடந்தகால உடன்பாடுகளில் இருந்த குறைபாடுகளாலும் சில சிக்கல்கள் எழுந்தன; மேலும் அந்த நிறுவனங்கள் எரிபொருள் விநியோகத்தைக் குறைத்துக் கொண்டன.

இதன் விளைவாக, பெட்ரோலியக் கூட்டுத்தாபனத்தின் சந்தைப் பங்கு 66 சதவீதத்திலிருந்து 80 சதவீதமாக அதிகரித்தது.

தேவையற்ற எரிபொருள் பயன்பாடு என்பது நாட்டின் மதிப்புமிக்க டொலர்களை எரிப்பதற்குச் சமம்.

எரிபொருள் பயன்பாடு அதிகரிப்பது டொலர் மாற்று விகிதத்தையும் அனைத்துப் பொருட்கள் மற்றும் சேவைகளின் விலையையும் நேரடியாகப் பாதிக்கும் .

எனவே,  கியூ ஆர் குறியீட்டு முறையை கண்டிப்பாக  நடைமுறைப்படுத்த அறிவுறுத்தல்கள் வழங்கப்பட்டுள்ளன.

மிகக் கடுமையான எண்ணெய் விலை உயர்வு தணிவதற்கான அறிகுறி இன்னும் தென்படவில்லை.

டீசல் விலை உலகச் சந்தையில் 91 சதவீதம் உயர்ந்திருந்தாலும், உள்நாட்டுச் சந்தையைப் பொறுத்தவரை, டீசல் விலை 39 சதவீதம் மட்டுமே உயர்த்தப்பட்டுள்ளது.

பிப்ரவரி மாதத்துடன் ஒப்பிடுகையில், உள்நாட்டுச் சந்தையில் எரிபொருள் விலை 39.5 சதவீத உயர்ந்துள்ளது.

பெட்ரோலைப் பொறுத்தவரை, உலகச் சந்தை விலை 80 சதவீதம் உயர்ந்துள்ளது. ஆனால் நேற்று பெட்ரோல் விலையை உயர்த்திய பிறகும், அந்த உயர்வு 41.3 சதவீதமாகவே உள்ளது.

டீசலுக்கு ஒரு லீற்றருக்கு 70 ரூபா மானியம் வழங்க முடிவு செய்யப்பட்டதால்தான் இந்த அளவிலாவது விலையைக் கட்டுக்குள் வைத்திருக்க முடிந்தது.

ஆனால் பெட்ரோலுக்குப் பொதுமக்களுக்கு அத்தகைய மானியம் எதுவும் வழங்கப்படவில்லை.

இதற்காக அரசு 41 பில்லியன் ரூபாயை ஒதுக்கியது. அடுத்த மூன்று மாதங்களுக்கான தேவையை முன்னிட்டு இந்தத் தொகை ஒதுக்கப்பட்டது.

நேற்று எரிபொருள் விலையை உயர்த்திய பிறகு, உலகச் சந்தை விலையுடன் ஒப்பிட்டுப் பார்த்தால், ஒரு லீற்றர் டீசலின் அடக்கவிலை 528 ரூபாவாக உள்ளது.

ஆனால் நாம் அதை 392 ரூபாவுக்கு விற்கிறோம்.  இதில் 136 ரூபா இழப்பு ஏற்படுகிறது.அதில் 70 ரூபாவை அரசாங்கம் ஏற்கிறது; மீதமுள்ள 66 ரூபாயை பெட்ரோலியக் கூட்டுத்தாபனம் ஏற்கிறது.

பெட்ரோலைப் பொறுத்தவரை, ஒரு லீற்றரின் அடக்கவிலை 446 ரூபாவாக உள்ளது; அது 414 ரூபாவுக்கு விற்கப்படுகிறது. இதனால் பெட்ரோலியக் கூட்டுத்தாபனத்திற்கு 52 ரூபா இழப்பு ஏற்படுகிறது.

அதேபோல, சூப்பர் டீசலின் அடக்கவிலை 581 ரூபாவாக உள்ளது; அது 528 ரூபாவுக்கு விற்கப்படுகிறது. 50 ரூபா விலை உயர்த்தப்பட்ட பிறகும், இதில் 53 ரூபா இழப்பு உள்ளது.

இதுதான் தற்போதைய நிலை.

தற்போதைய சூழல் நம்மை மட்டுமல்ல, உலகின் அனைத்து நாடுகளையும் கடுமையாகப் பாதித்துள்ளது.

உதாரணமாக, கடந்த பெப்ரவரி அல்லது கடந்த ஆண்டோடு ஒப்பிடுகையில், பாகிஸ்தானில் எரிபொருள் விலை 52% அதிகரித்துள்ளது.பிலிப்பைன்ஸில் 60.9%, நேபாளத்தில் 37%, மியான்மரில் 62% என உயர்ந்துள்ளது.

அமெரிக்காவில் டீசல் விலை 67% அதிகரித்துள்ளது. ஜெர்மனியில் 54%, டென்மார்க்கில் 50%, பிரான்சில் 43% என விலைகள் உயர்ந்துள்ளன; அங்கு விலைகள் தினமும் மாறுகின்றன.

எதிர்காலத்தில் சுத்திகரிக்கப்பட்ட எரிபொருள் இறக்குமதியை நிறுத்த அமெரிக்கா முடிவு செய்துள்ளதை நீங்கள் அறிவீர்கள். அந்த இறக்குமதியைக் கட்டுப்படுத்த அவர்கள் பயணத் தடைகள் மற்றும் வேகக் கட்டுப்பாடுகளை விதித்து வருகின்றனர்.

இது நமக்கு மட்டும் ஏற்பட்ட பிரச்சினை அல்ல; இது உலகம் முழுவதையும் பாதிக்கும் ஒரு விடயம்.

இது நம்முடைய தனிப்பட்ட பிரச்சனை அல்ல, இது நம்மை வந்தடைந்த ஒரு உலகளாவிய பிரச்சனை. எனவே, நாம் இதை எதிர்கொள்ள வேண்டும். இதைச் சரியாகக் கையாளாவிட்டால், இது ஒரு மிகப்பெரிய நெருக்கடியாக மாறக்கூடும் என்றும், சிறிலங்கா பெட்ரோலியக் கூட்டுத்தாபனத்தின் தலைவர் டி.ஜே. ராஜகருண தெரிவித்தார்.