அமெரிக்காவின் மொன்டானா மாகாண ஆளுநர் கிரெக் கியான்போர்ட் (Greg Gianforte) தலைமையிலான குழுவொன்று சிறிலங்காவுக்குப் பயணம் மேற்கொள்ளவுள்ளது.

அமெரிக்க விவசாய ஏற்றுமதிக்கான வாய்ப்புகளை விரிவுபடுத்தவும், மொன்டானா தேசிய காவல்படையின் மாநில கூட்டாண்மைத் திட்டத்தின் மூலம் பாதுகாப்பு ஒத்துழைப்பை ஆழப்படுத்தவும் இன்று இந்தக் குழு கொழும்பு வரவுள்ளது.

மொன்டானா அதன் பரந்த திறந்தவெளி நிலப்பரப்புகள், வளமான விவசாய நிலங்கள் மற்றும் ராக்கி மலைச் சிகரங்களுக்குப் பெயர் பெற்றது.

கொண்டைக்கடலை, மைசூர் பருப்பு மற்றும் உலர்ந்த பட்டாணி போன்ற பருப்பு வகைகளை உற்பத்தி செய்வதில் மொன்டானா அமெரிக்காவின் முன்னணி மாநிலமாகும்.

மொன்டானாவில் விளையும் பொருட்களுக்கு புதிய சந்தைகளை ஆராய்வதற்கும், அமெரிக்க விவசாயிகளுக்கான வாய்ப்புகளை விரிவுபடுத்துவதற்கும், சிறிலங்கா வணிகங்களுடன் வர்த்தக உறவுகளை வலுப்படுத்துவதற்கும், இந்தத் தூதுக்குழு சிறிலங்கா பருப்பு இறக்குமதியாளர்கள் மற்றும் வர்த்தகர்களுடன் கலந்துரையாடத் திட்டமிட்டுள்ளது.

“மொன்டானாவின் பண்ணைகள் முதல் சிறிலங்காவின் இந்தியப் பெருங்கடல் கடற்கரைகள் வரை, இந்தக் கூட்டாண்மை பொருளாதார வாய்ப்பை பகிரப்பட்ட பாதுகாப்புடன் இணைக்கிறது,” என்று சிறிலங்காவுக்கான அமெரிக்கத் தூதுவர் எரிக் மேயர் குறிப்பிட்டுள்ளார்.

மொன்டானாவின் இணைப்பதிகாரியும், மொன்டானா தேசியக் காவல்படையின் தளபதியுமான பிரிகேடியர் ஜெனரல் டிரென்டன் கிப்சன் (Brigadier General Trenton Gibson),  2021 முதல் மொன்டானாவையும் சிறிலங்காவையும் இணைத்துள்ள அரச கூட்டாண்மைத் திட்டத்தின் மூலம் பாதுகாப்பு ஒத்துழைப்பை மேம்படுத்துவதற்காக, மாகாண ஆளுநரின் தூதுக்குழுவுடன் சிறிலங்கா வரவுள்ளார்.

2025-ல், மொன்டானா தேசியக் காவல்படையும் சிறிலங்கா பாதுகாப்பு அமைச்சும், பேரிடர் மீட்பு, கடல்சார் கள விழிப்புணர்வு மற்றும் தொழில்முறை இராணுவக் கல்வி ஆகியவற்றில் ஒத்துழைப்பை முறைப்படுத்தவும் விரிவுபடுத்தவும் ஒரு புரிந்துணர்வு உடன்பாட்டில் கையெழுத்திட்டன.

இந்தக் கூட்டாண்மை, பேரிடர் தயார்நிலை, கடல்சார் பாதுகாப்பு மற்றும் இராணுவ வீரர்களின் தொழில்முறைத் திறன்களை வலுப்படுத்துவதோடு, மொன்டானாவுக்கும் சிறிலங்காவுக்கும் இடையே நீடித்த உறவுகளைக் கட்டியெழுப்புகிறது.

மொன்டானா ஆளுநரின் இந்தப் பயணம் அந்த ஒத்துழைப்பை மேலும் ஆழப்படுத்துவதோடு, விவசாய வர்த்தகத்திற்கான புதிய வாய்ப்புகளையும் உருவாக்கும் என அமெரிக்க தூதரக செய்திக்குறிப்பில் கூறப்பட்டுள்ளது.