தனியார் எண்ணெய் விநியோக நிறுவனங்களுடனான உடன்பாடுகளை மறுபரிசீலனை செய்ய நேரிடும் என சிறிலங்கா அதிபர் அனுரகுமார திசாநாயக்க எச்சரிக்கை விடுத்துள்ளார்.

நேற்று இப்பாகமுவவில் நடைபெற்ற ‘தேசிய மக்கள் சக்தி’ பொதுக்கூட்டத்தில் உரையாற்றிய போதே அவர் இந்த எச்சரிக்கையை விடுத்துள்ளார்.

நடைமுறையில் உள்ள விலையில் எரிபொருளை விற்க மறுக்கும் தனியார் எரிபொருள் விநியோக நிறுவனங்கள் மீது நடவடிக்கை எடுப்பதில் தற்போதைய உடன்பாடுகள் சிக்கல்களை உருவாக்கியுள்ளன.

சில தனியார் நிறுவனங்களின் எரிபொருள் நிரப்பு நிலையங்களில் எரிபொருள் இருப்பு உள்ளது; ஆனால் விலையை உயர்த்தினாலன்றி அவற்றை விற்க அவர்கள் மறுக்கிறார்கள்.

அவர்கள் சந்தையில் நுழைய அனுமதிக்கப்பட்டபோது கையெழுத்திடப்பட்ட உடன்பாடுகள் காரணமாக, அவர்கள் மீது சட்ட நடவடிக்கை எடுக்க முடியவில்லை.

இந்த உடன்பாடுகள் எங்கள் கைகளைக் கட்டிப்போட்டுள்ளன. நாங்கள் அவற்றை மறுபரிசீலனை செய்வோம்.

தனியார் எரிபொருள் நிறுவனங்கள் கணிசமான விலை உயர்வை கோரியுள்ளன.

ஒரு நிறுவனம் டீசல் ஒரு லிட்டருக்கு 132 ரூபாவும், மற்றொரு நிறுவனம் 116 ரூபாவும் உயர்த்தக் கோரியுள்ளன.

இருப்பினும், நுகர்வோருக்கு மானியங்களை வழங்குவதைத் தொடரும் அதேவேளையில்,  பெட்ரோலியக் கூட்டுத்தாபனத்தின் எரிபொருள் நிரப்பு நிலையங்களில் டீசல் விலை உயர்வை லிட்டருக்கு 10 ரூபாவாக அரசு மட்டுப்படுத்தியுள்ளது.

அவர்கள் விரும்பும் விலையில் எரிபொருளை விற்கலாம் என்று நாங்கள் அவர்களிடம் தெரிவித்துள்ளோம். நாங்கள் எங்கள் விலையிலேயே தொடர்ந்து விற்போம்.

தற்போதைய உடன்பாடுகளின் கீழ் வேறு தீர்வு எதுவும் இல்லை.

தற்போதைய நிர்வாகத்தின் கீழ் பெட்ரோலியக் கூட்டுத்தாபனம், ஒரு இலாபம் ஈட்டும் நிறுவனமாக மாற்றப்பட்டுள்ளது.

அரசுக்குச் சொந்தமான எரிபொருள் விநியோக நிறுவனத்தை வலுப்படுத்தவும், உலகளாவிய எரிபொருள் விலை உயர்வு இருந்தபோதிலும் அதிகப்படியான விலை உயர்விலிருந்து நுகர்வோரைப் பாதுகாக்கவும் அரசு உறுதியுடன் உள்ளது.

டீசல் சந்தையில் பெட்ரோலியக் கூட்டுத்தாபனத்தின் பங்கு 77 சதவீதமாக அதிகரித்துள்ளது.

தனியார் விநியோக நிறுவனங்கள், மீதமுள்ள சந்தைத் தேவையைப் பூர்த்தி செய்ய முடியாவிட்டால், அந்தத் தேவையை நிறைவேற்ற அரசுக்குச் சொந்தமான நிறுவனம் தயாராக இருக்கிறது.

அவர்களால் 23 சதவீத தேவையை கையாள முடியாவிட்டால், நாங்களே அதைச் செய்வோம்,” என்றும் சிறிலங்கா அதிபர் தெரிவித்தார்.