தேவையற்ற வெளிப்புற அழுத்தத்தின் காரணமாக,சிறிலங்காவின் வடக்கு, கிழக்கு மாகாணங்களில் முதலீடு செய்யும் போது அல்லது ஒத்துழைப்பை நாடும் போது சீன நிறுவனங்கள் நீண்ட காலமாகத் தடைகளைச் சந்தித்து வருவதாக, சிறிலங்காவுக்கான சீனத் தூதுவர் கீ சென்ஹொங் தெரிவித்துள்ளார்.

கொழும்பு ஆங்கில நாளிதழ் ஒன்றுக்கு அளித்துள்ள செவ்வியில் எழுப்பப்பட்ட கேள்வி ஒன்றுக்குப் பதிலளித்துள்ள அவர் இதனைக் குறிப்பிட்டுள்ளார்.

பிராந்திய அளவிலான அனைத்து அச்சுறுத்தல் நடவடிக்கைகளையும் நாங்கள் உறுதியாக எதிர்க்கிறோம்.

உதாரணமாக, 2019-ஆம் ஆண்டில், யாழ்ப்பாணத்தில் உள்ள மூன்று தீவுகளில் நிலவும்  நிலையற்ற மின்சார விநியோகப் பிரச்சினைக்குத் தீர்வு காணும் பொருட்டு, சிறிலங்கா அரசாங்கம் ஒரு கலப்பு மின் உற்பத்தித் திட்டத்திற்கான ஒப்பந்தப்புள்ளிகளைக் கோரியது.

ஒரு சீன நிறுவனம் இந்த ஒப்பந்தப்புள்ளியில்  பங்கேற்று, ஒப்பந்தத்தைப் பெற்றது.

அமைச்சரவையின் ஒப்புதலைப் பெற்றிருந்த போதிலும், வெளிப்புற அழுத்தத்தின் காரணமாக 2021-ஆம் ஆண்டில் இந்தத் திட்டம் இறுதியில் இடைநிறுத்தப்பட்டது.

அந்த மூன்று தீவுகளில் வசிக்கும் மக்களைப் பாதிக்கும் மின்சார விநியோகப் பிரச்சினை இன்னமும் தீர்க்கப்படாமல் உள்ளது என்று தெரியவந்துள்ளது.

இந்தத் திட்டம் தடையின்றிச் செயற்படுத்தப்பட்டிருந்தால், சுமார் 10,000 உள்ளூர்வாசிகள் நம்பகமான மற்றும் உயர்தரமான மின்சார விநியோகத்தைப் பெற்றிருப்பார்கள்.

சீனாவும் சிறிலங்காவும் 2,000 ஆண்டுகளுக்கும் மேலான நட்புறவுப் பரிமாற்ற வரலாற்றைக் கொண்ட, பாரம்பரியமான நட்புறவு அண்டை நாடுகளாகும்.

பண்டைய கடல்வழிப் பட்டுப்பாதைக் காலத்திலேயே, இரு நாடுகளும் வர்த்தகம் மற்றும் கலாசாரப் பரிமாற்றங்கள் மூலம் நெருங்கிய உறவுகளை ஏற்படுத்தியிருந்தன.

600 ஆண்டுகளுக்கு முன்னர், சீன மாலுமி செங் ஹேயின் (Zheng He) கப்பல் படை திருகோணமலையில் பலமுறை நிறுத்தப்பட்டது.

அதன் காரணமாகவே,  திருகோணமலை துறைமுகத்தில்  சீனக்குடா என்ற பெயர் இன்றுவரை நிலைத்திருக்கிறது.

சீனா நீண்டகாலமாக வடக்கு மற்றும் கிழக்கு மாகாணங்களுக்கு தன்னால் இயன்றவரை ஆதரவையும் உதவியையும் வழங்கி வருகிறது.

கோவிட்-19 பெருந்தொற்றின் போது, ​​சீன அரசாங்கம் இரு மாகாணங்களுக்கும் ஒரு மில்லியன்  சினோபார்ம் தடுப்பூசிகளை நன்கொடையாக வழங்கியது.

இது உள்ளூர் மக்களின் உடல்நலம் மற்றும் பாதுகாப்பைப் பேணுவதில் ஒரு முக்கியப் பங்களிப்பைச் செய்தது.

2024-ஆம் ஆண்டில், சீன அரசாங்கம் இரு மாகாணங்களுக்கும் சுமார் 1.5 பில்லியன் ரூபா மதிப்பிலான உதவியை வழங்கியது. இதில் அரிசி, முன்வடிவமைக்கப்பட்ட வீடுகள் மற்றும் மீன்பிடி வலைகள் ஆகியவை அடங்கும்.

இது பேரிடரால் பாதிக்கப்பட்ட மக்கள் சிரமங்களைக் கடந்துவர உதவியது.

நான் வடக்கு மற்றும் கிழக்கு மாகாணங்களுக்குப் பலமுறை சென்றுள்ளேன். மேலும், தேவைப்படும் உள்ளூர் மக்களுக்கு ஏராளமான உணவுப் பொட்டலங்களை நன்கொடையாக வழங்கியுள்ளேன்.

இந்தப் பயணங்கள், வளர்ச்சிக்கான உள்ளூர் மக்களின் வலுவான விருப்பத்தைப் பற்றி எனக்குத் தெளிவான புரிதலை அளித்துள்ளன.

அவர்கள் சீனாவுடன் மிகவும் நட்பாக உள்ளனர், மேலும் சீன நிறுவனங்கள் அங்கு முதலீடு செய்து உள்ளூர் பொருளாதார வளர்ச்சியை ஊக்குவிப்பதை ஆவலுடன் எதிர்பார்க்கின்றனர்.

இருப்பினும், சீனத் தரப்பு இரு மாகாணங்களிலும் முதலீட்டுத் திட்டங்களை முன்னெடுக்க முற்படும் போதெல்லாம், அது விளக்க முடியாத சிக்கல்களையும் எதிர்ப்புகளையும் தவறாமல் சந்திப்பது எனக்குப் புதிராகவும் விரக்தியாகவும் இருக்கிறது என்றும் சீனத் தூதுவர் குறிப்பிட்டுள்ளார்.