அனைத்துலக கடற்படை மீளாய்வு ( International Fleet Review) மற்றும்  மிலன்  (MILAN) கூட்டுப் பயிற்சியில் பங்கேற்பதற்காக,  தாய்லாந்து, அவுஸ்ரேலியா, சிறிலங்கா கடற்படைக் கப்பல்கள்  நேற்று விசாகப்பட்டினத்தை சென்றடைந்துள்ளன.

தாய் கடற்படையின் கடல்சார் ரோந்து கப்பலான கிராபியை (HTMS Krabi), அவுஸ்ரேலிய கடற்படையின் போர்க்கப்பலான  வாரமுங்கா (HMAS Warramunga) , சிறிலங்கா   கடற்படையின்   நந்திமித்ர மற்றும் சாகர ஆகிய போர்க்கப்பல்களே விசாகப்பட்டினத்தை அடைந்துள்ளன.

சுதந்திர இந்தியாவின் மிகப்பெரிய கடற்படை நிகழ்வுகளில் ஒன்றான, அனைத்துலக  கடற்படை மீளாய்வு, மற்றும்  மிலன் கூட்டுப் பயிற்சியில் 65 நாடுகளின் பிரதிநிதிகளுடன், 19 வெளிநாட்டு போர்க்கப்பல்கள் உட்பட 71 கப்பல்கள் பங்கேற்கின்றன.

பெப்ரவரி 18 ஆம் நாள் இந்திய குடியரசுத் தலைவரால்  கடலில் அனைத்துலக  கடற்படை மீளாய்வு செய்யப்படும்.

19 வெளிநாட்டு போர்க்கப்பல்கள் மற்றும் இந்திய கடற்படையின் 45 கப்பல்கள் பங்கேற்கும் இந்த நிகழ்வில், மொத்தம் 71 கப்பல்கள் பங்கேற்கும்.

அத்துடன் கடலோர காவல்படை, வணிக கடற்படை மற்றும் ஆராய்ச்சி கப்பல்களும் இதில் இடம்பெறும்.

1995 இல் நான்கு நாடுகளுடன் தொடங்கிய மிலன் பயிற்சிகள், இப்போது உலகளவில் 65 கடற்படைகளை உள்ளடக்கியதாக விரிவடைந்துள்ளது.

இதில் பங்கேற்பதற்காக இ்ந்தியக் கடற்படையின் ஐஎன்எஸ் விக்ராந்த் ஏற்கனவே விசாகப்பட்டினத்தை வந்தடைந்துள்ளது.

அனைத்துலக கடற்படை ஒத்துழைப்பை வலுப்படுத்துவதிலும் இந்தியாவின் கடல்சார் திறன்களை வெளிப்படுத்துவதிலும் இந்த நிகழ்வு முக்கியத்துவம் வாய்ந்தது என  வைஸ் அட்மிரல் சஞ்சய் பல்லா  தெரிவித்துள்ளார்.

இந்த  நிகழ்வு பிரதமர் நரேந்திர மோடியின் மஹாசாகர் பற்றிய தொலைநோக்குப் பார்வையை செயல்படுத்துவதில் ஒரு முக்கிய படியைக் குறிக்கும், அதே நேரத்தில் இந்தியாவின் உள்நாட்டு கடற்படை திறன்களையும் பிராந்தியங்கள் முழுவதும் விருப்பமான பாதுகாப்பு கூட்டாளியாக இருப்பதற்கான அதன் உறுதிப்பாட்டையும் எடுத்துக்காட்டுகிறது.

2026 பெப்ரவரியில், விசாகப்பட்டினத்தில் மூன்று முக்கிய அனைத்து கடல்சார் நிகழ்வுகளை இந்தியா நடத்தும், அதாவது அனைத்துலக கடற்படை மதிப்பாய்வு  2026, மிலன் கூட்டுப் பயிற்சி 2026,  ஆகியவற்றுடன்,  இந்தியப் பெருங்கடல் கடற்படை கருத்தரங்கு (IONS) தலைவர்கள் மாநாடு ஆகியவற்றை 2026 பிப்ரவரி 15 முதல் 25 வரை நடத்த திட்டமிடப்பட்டுள்ளது.

இந்த முக்கிய கடல்சார் நிகழ்வுகளை இந்தியா ஒரே நேரத்தில் நடத்துவது இதுவே முதல் முறையாகும்.