தாமதமாகி வரும் மாகாண சபைத் தேர்தல்கள் தொடர்பாக சிறிலங்கா அதிபர் செயலகத்திற்கு பலமுறை  கடிதம் எழுதிய போதும், இன்னும் பதில் கிடைக்கவில்லை என்று தேர்தல் ஆணைக்குழுவின் தலைவர் ஆர்.எம்.ஏ.எல். ரத்நாயக்க தெரிவித்துள்ளார்.

மாகாண சபைத் தேர்தல் குறித்த சட்டரீதியான தடைகள் குறித்து தெளிவுபடுத்தியும், அதனை நீக்க நடவடிக்கை எடுக்கக் கோரியும், தேர்தல்கள் ஆணைக்குழு அதிபர் செயலகத்திற்கு நான்கு கடிதங்களை அனுப்பியது.

அதற்கு இதுவரை எந்தப் பதிலும் கிடைக்கவில்லை.  இந்த விவகாரம்  முற்றிலும் சட்டரீதியான ஒன்றாக இருப்பதால், தேர்தல்கள் ஆணைக்குழுவால் முன்னேற முடியவில்லை.

இந்த கட்டத்தில் நாங்கள் எதுவும் செய்ய முடியாது. இது எங்கள் கட்டுப்பாட்டிற்கு அப்பாற்பட்டது.

தொடர்புடைய சட்ட திருத்தங்கள் செய்யப்படும் வரை தேர்தல்கள் ஆணைக்குழுவினால் எந்த நடவடிக்கையும் எடுக்க முடியாது.

தேவையான நடவடிக்கைகளை எடுக்குமாறு நாங்கள் கோரியுள்ளோம், ஆனால் இதுவரை எந்த பதிலும் இல்லை.

முன்னர் ஒரு சந்தர்ப்பத்தில், தற்போது இரண்டு சாத்தியமான வழிகள் இருந்தன.

முந்தைய விகிதாசார பிரதிநிதித்துவ  முறையைப் பயன்படுத்தி தேர்தலை நடத்துவது அல்லது புதிய எல்லை நிர்ணய செயல்முறைக்குப் பின்னர் தேர்தலை நடத்துவது ஆகியனவே அவை.

இதில், முந்தைய முறைக்குத் திரும்புவது தேர்தல்களை விரைவாக நடத்த அனுமதிக்கும்.

புதிய எல்லை நிர்ணயத்தைத் தேர்ந்தெடுத்தால், ஓராண்டுக்கு மேல் ஆகும் என்றும் அவர் எச்சரித்துள்ளார்.