சிறிலங்காவுடன் மூலோபாய கூட்டுறவு பங்காண்மையை ஆழப்படுத்த சீனா விரும்புவதாக சீன வெளியுறவு அமைச்சர் வாங் யி, தெரிவித்துள்ளார்.

ஆபிரிக்க நாடுகளுக்கான பயணத்தை முடித்துக் கொண்டு திரும்பும் வழியில், சீன வெளியுறவு அமைச்சர் வாங் யி, நேற்று சிறிலங்காவுக்கு குறுகிய பயணத்தை மேற்கொண்டிருந்தார்.

இதன்போது சிறிலங்கா வெளிவிவகார  அமைச்சர் விஜித ஹேரத்தை சந்தித்துப் பேச்சு நடத்திய போதே வாங் யி இதனைத் தெரிவித்துள்ளதாக சீன செய்தி நிறுவனமான சின்ஹூவா செய்தி வெளியிட்டுள்ளது.

பேரழிவைச் சமாளிக்க சிறிலங்காவுக்கு சீனா விரைவாக உதவிக்கரம் நீட்டியுள்ளதாகவும், சிறிலங்கா மக்கள் பேரழிவைச் சமாளித்து, விரைவில் தங்கள் வீடுகளை மீண்டும் கட்டியெழுப்புவார்கள் என்று நம்புவதாகவும் வாங் யி குறிப்பிட்டுள்ளார்.

சீன ஆட்சி அனுபவப் பரிமாற்றங்களை மேம்படுத்தவும், பல்வேறு துறைகளில் நடைமுறை ஒத்துழைப்பை விரிவுபடுத்தவும், மக்களிடையேயான பரிமாற்றங்களை இலகுபடுத்தவும், இரு நாடுகளுக்கும் இடையிலான நேர்மையான பரஸ்பர உதவி மற்றும் நித்திய நட்பின் அடிப்படையில், மூலோபாய கூட்டுறவு பங்காண்மையை மேலும் ஆழப்படுத்தவும், பகிரப்பட்ட எதிர்காலத்துடன் கூடிய சீன-சிறிலங்கா சமூகத்தை கூட்டாகக் கட்டியெழுப்பவும் சீனா தயாராக இருப்பதாக வாங் தெரிவித்துள்ளார்.

அதிகரித்து வரும் சிக்கலான மற்றும் நிலையற்ற அனைத்துலக சூழ்நிலையை எதிர்கொண்டு, வளரும் நாடுகளின், குறிப்பாக சிறிய மற்றும் நடுத்தர நாடுகளின் சட்டபூர்வமான உரிமைகள் மற்றும் நலன்களை சீனா உறுதியாகப் பாதுகாக்கும் என்றும்,  ஐ.நா. சாசனம் மற்றும் அனைத்துலக சட்டத்தின் நோக்கங்கள் மற்றும் கொள்கைகளை நிலைநிறுத்தும் என்றும், “காட்டுச் சட்டம்” மீண்டும் எழுச்சி பெறுவதையும், அனைத்து வகையான அதிகார அரசியல் மற்றும் கொடுமைப்படுத்துதலையும் எதிர்க்கும் என்றும், மற்றும் பலதரப்பு மற்றும் அனைத்துலக நியாயம் மற்றும் நீதியைப் பாதுகாக்கும் என்றும் சீன வெளியுறவு அமைச்சர் உறுதியளித்துள்ளார்.

ஒரே-சீனா கொள்கையை சிறிலங்கா நீண்டகாலமாக கடைப்பிடிப்பதை சீனா பாராட்டுவதாகவும், அதன் தேசிய நிலைமைகளுக்கு ஏற்ற வளர்ச்சிப் பாதையைத் தொடர சிறிலங்காவைத் தொடர்ந்து ஆதரிக்கத் தயாராக இருப்பதாகவும் வாங் குறிப்பிட்டுள்ளார்.

தெற்காசியாவை நோக்கிய பிராந்திய ஒத்துழைப்பை இரு தரப்பினரும் வலுப்படுத்த முடியும் என்றும், மிகவும் நியாயமான மற்றும் சமமான உலகளாவிய நிர்வாக முறையை கூட்டாக ஊக்குவிக்க முடியும் என்றும் அவர் தெரிவித்துள்ளார்.

இந்தச் சந்திப்பின் போது பேரிடருக்குப் பின்னர்,  சீனாவின் மதிப்புமிக்க உதவிக்கு சிறிலங்கா வெளிவிவகார அமைச்சர் நன்றி தெரிவித்தார்.

சிறிலங்கா, சீனாவை அதன் மிகவும் நம்பகமான மூலோபாய பங்காளிகளில் ஒன்றாகக் கருதுகிறது என்றும், சீனாவுடன் நெருக்கமான உயர்மட்ட பரிமாற்றங்களைப் பேணவும்,  உள்கட்டமைப்பு, கடல்சார் விவகாரங்கள், சுற்றுலா மற்றும் கலாசார பரிமாற்றங்களில் ஒத்துழைப்பை ஆழப்படுத்தவும், சிறிலங்கா -சீன மூலோபாய கூட்டுறவு பங்காண்மையை தொடர்ந்து மேம்படுத்தவும் தயாராக உள்ளது என்றும் அமைச்சர் விஜித ஹேரத் குறிப்பிட்டுள்ளார்.

ஒரே சீனா கொள்கையை சிறிலங்கா தொடர்ந்து கடைப்பிடிப்பதை  மீண்டும் உறுதிப்படுத்திய அவர்,  அதன் இறையாண்மை மற்றும் பிராந்திய ஒருமைப்பாட்டைப் பாதுகாப்பதற்கான சீனாவின் முயற்சிகளுக்கு உறுதியான ஆதரவைத் தெரிவித்தார்.

மேலும் வளரும் நாடுகளின் நியாயமான உரிமைகள் மற்றும் நலன்களைக் கூட்டாகப் பாதுகாக்க பலதரப்பு விவகாரங்களில் சீனாவுடன் தொடர்பு மற்றும் ஒருங்கிணைப்பை வலுப்படுத்த சிறிலங்கா தயாராக உள்ளதாகவும் விஜித ஹேரத் தெரிவித்துள்ளார் என சின்ஹூவா மேலும் தெரிவித்துள்ளது.