இந்தியப் பெருங்கடல் கடலோர கூட்டணியை (Indian Ocean Coastal Alliance) உருவாக்குவதற்கான புரிந்துணர்வு உடன்பாட்டில் சிறிலங்கா கையெழுத்திடுவதற்கு, அமைச்சரவை அனுமதி அளித்துள்ளது.

இந்தியப் பெருங்கடல் மீன்பிடித் தொழில், தேசிய பொருளாதாரங்கள், உணவுப் பாதுகாப்பு, வேலைவாய்ப்பு உருவாக்கம் மற்றும் இந்தியப் பெருங்கடல் பிராந்தியத்தில் கடலோர சமூகங்களின் சமூக-பொருளாதார உறுதித்தன்மைக்கு குறிப்பிடத்தக்க பங்களிப்பை வழங்குகிறது.

இருப்பினும், மீன்களின் எண்ணிக்கை குறைந்து வருவது மற்றும் அதிகளவில் மீன்பிடித்தல் காரணமாக உணவுப் பாதுகாப்புக்கு ஏற்படும் அச்சுறுத்தல்கள் குறித்து கவலைகள் எழுந்துள்ளன.

எனவே, துனா மீன் வளங்களை நிர்வகிப்பதில் பிராந்திய ஒத்துழைப்பை வலுப்படுத்த பங்களாதேஷ், இந்தோனேசியா, ஈரான், மடகாஸ்கர், மலேசியா, மாலைதீவு, மொசாம்பிக், பாகிஸ்தான், சோமாலியா, தென்னாபிரிக்கா மற்றும் சிறிலங்கா ஆகிய நாடுகளுக்கு இடையே ஒரு புரிந்துணர்வு ஒப்பந்தம் மூலம் இந்தியப் பெருங்கடல் கடலோர கூட்டணியை நிறுவ முன்மொழியப்பட்டுள்ளது.

உறுப்பு நாடுகளிடையே ஒத்துழைப்பை மேம்படுத்துதல், மீனவ சமூகங்களின் வாழ்வாதாரத்தை மேம்படுத்துதல், மீன் வளங்களை மேம்படுத்துதல் மற்றும் மீன்வள வளங்களின் நிலையான மேலாண்மையை உறுதி செய்தல் ஆகிய நோக்கங்களுடன், இந்தியப் பெருங்கடல் கடலோர கூட்டணியை நிறுவுவதற்கான, புரிந்துணர்வு உடன்பாடு கையெழுத்திடப்படவுள்ளது.

இந்த உடன்பாட்டில் கையெழுத்திடுவதற்காக சிறிலங்காவின் கடற்தொழில் நீரியல் வளங்கள்   அமைச்சர் சமர்ப்பித்த முன்மொழிவுக்கு அமைச்சரவை ஒப்புதல் அளித்துள்ளது.