ஒழுங்கமைக்கப்பட்ட குற்றங்களைத் தடுக்கும் சட்டமூலத்தை உடனடியாகத் திரும்பப் பெறுமாறு, சிறிலங்கா அரசாங்கத்திற்கு அனைத்துலக மன்னிப்புச் சபை அழைப்பு விடுத்துள்ளது.

அத்துடன்,இந்தச் சட்டம் அதிகாரிகளுக்கு வரம்பற்ற அதிகாரங்களை வழங்குவதோடு, அடிப்படை மனித உரிமைகளையும் சீர்குலைக்கும் என்றும் அது எச்சரித்துள்ளது.

நேற்று வெளியிடப்பட்ட அறிக்கை ஒன்றில்,  முன்மொழியப்பட்ட இந்தச் சட்டமூலத்தை, தேசிய மக்கள் சக்தி அரசாங்கத்தால் அறிமுகப்படுத்தப்பட்ட மிகவும் கவலைக்குரிய சட்டங்களில் ஒன்றாகஅனைத்துலக மன்னிப்புச் சபை, விவரித்துள்ளது.

இந்த சட்டமூலம், சந்தேக நபர்களை விசாரணையின்றி இரண்டு ஆண்டுகள் வரை காவலில் வைக்க அனுமதிக்கக்கூடும் என்றும், உயர் காவல்துறை அதிகாரிகளிடம் அளிக்கப்பட்ட வாக்குமூலங்களை நீதிமன்றத்தில் சான்றாகப் பயன்படுத்த வழிவகுக்கும் என்றும், நீதிமன்ற நடவடிக்கைகள் குறித்த ஊடகங்களின் செய்தியறிக்கைகளைக் கட்டுப்படுத்தக்கூடும் என்றும் அனைத்துலக மன்னிப்புச் சபை, எச்சரித்துள்ளது.

மேலும், பிடியாணையின்றி சோதனைகளை நடத்தவும், தொலைபேசி பதிவுகள், சந்தாதாரர் அடையாளங்கள் மற்றும் சாதன இருப்பிடத் தரவுகள் உள்ளிட்ட தனிப்பட்ட தகவல்களை நீதிமன்ற உத்தரவின்றிப் பெறவும் காவல்துறைக்கு அனுமதிக்கும் விதிகள் குறித்தும் அது கவலைகளை எழுப்பியுள்ளது.

“தேசிய மக்கள் சக்தி அரசாங்கத்தால் முன்மொழியப்பட்ட தொடர்ச்சியான அடக்குமுறைச் சட்டங்களில், இந்த அசாதாரணமான சட்டமூலமே மிகவும் கவலையளிப்பதாக உள்ளது.

இது பயங்கரவாதத் தடுப்புச் சட்டத்தின் மிக மோசமான அம்சங்களில் பெரும்பாலானவற்றை மீண்டும் அறிமுகப்படுத்தி, அவற்றை பரந்த அளவிலான குற்றங்களுக்குப் பயன்படுத்துகிறது,” என்றும் அனைத்துலக மன்னிப்புச் சபையின் தெற்காசிய இயக்குனர் ஸ்மிருதி சிங் கூறினார்.

முன்மொழியப்பட்ட இந்தச் சட்டம், சிறிலங்காவின் பயங்கரவாதத் தடுப்புச் சட்டத்தின்  கீழ் முன்னர் தன்னிச்சையான தடுப்புக்காவல், சித்திரவதை மற்றும் பிற மனித உரிமை மீறல்களுக்கு வழிவகுத்த நிலைமைகளை மீண்டும் உருவாக்கக்கூடும் என்று அந்த அமைப்பு எச்சரித்தது.

இந்தச் சட்டம், சந்தேக நபர்கள் மீது குற்றம் சாட்டுவதற்கு முன்பு அவர்களை ஓராண்டு வரை காவலில் வைக்கவும், அதைத் தொடர்ந்து மேலும் ஓராண்டு விசாரணைக்கு முந்தைய தடுப்புக்காவலில் வைக்கவும் அனுமதிக்கும்.

ஒருவர் ஒழுங்கமைக்கப்பட்ட குற்றக் குழுவைச் சேர்ந்தவரா என்பதைத் தீர்மானிக்கும்போது, நீதிமன்றங்கள் அவரது உடை, பச்சைக்குத்துகள், கை சைகைகள், மொழி, தொடர்புகள் மற்றும் அவர் சென்ற இடங்களைக் கருத்தில் கொள்ளக்கூடும் என்றும் அந்த அமைப்பு கவலை தெரிவித்தது.

இத்தகைய விதிகள் பாகுபாடு நிறைந்த ஆள் அடையாளப்படுத்தலை ஊக்குவித்து, நியாயமான விசாரணைக்கான உரிமையைக் குறைமதிப்பிற்கு உட்படுத்தக்கூடும் என்று அனைத்துலக மன்னிப்புச் சபை, எச்சரித்தது.

உதவி கண்காணிப்பாளர் பதவிக்கு மேலான காவல் அதிகாரிகளிடம் அளிக்கப்படும் வாக்குமூலங்களை ஆதாரமாக ஏற்றுக்கொள்ள அனுமதிக்கும் விதிகள் மற்றொரு முக்கிய கவலையாக உள்ளது.

மேலும், முன்மொழியப்பட்ட இந்தச் சட்டம், சித்திரவதை அல்லது பிற கொடுமைகள் நிகழ்ந்தன என்பதை நிரூபிக்கும் சுமையை குற்றம் சாட்டப்பட்டவர்கள் மீது சுமத்தும் என்றும் அந்த அமைப்பு கூறியது.

காவல்துறைக்குத் தகவல் அளிக்குமாறு தனிநபர்களைக் கட்டாயப்படுத்தும் விதிகளையும் அனைத்துலக மன்னிப்புச் சபை, மேலும் விமர்சித்துள்ளது; மீறுபவர்களுக்கு ஏழு ஆண்டுகள் வரை சிறைத்தண்டனை அல்லது ரூ. 100 கோடி அபராதம் விதிக்கப்படும். இணங்கத் தவறினால் 200,000 அபராதம் விதிக்கப்படும்.

நீதிமன்ற மேற்பார்வையின்றி தொலைத்தொடர்பு மற்றும் எண்ணிமப் பதிவுகளை அணுகுவது, ஊடகவியலாளர்களின் தகவலாளர்கள், வழக்கறிஞர்களின் தகவல்தொடர்புகள் மற்றும் சட்டபூர்வமான போராட்டங்களை ஏற்பாடு செய்பவர்களைக் கண்காணிப்புக்கு உள்ளாக்கக்கூடும் என்று அந்த அமைப்பு எச்சரித்தது.

“சித்திரவதை மற்றும் பிற கொடுமைகளுக்கு எதிரான பாதுகாப்புகளை பலவீனப்படுத்தும் மற்றும் நியாயமான விசாரணைக்கான உத்தரவாதங்களை ஆபத்தில் ஆழ்த்தும் சட்டத்தை அறிமுகப்படுத்துவதன் மூலம் சிறிலங்கா ஒரு ஆபத்தான பாதையில் செல்கிறது; இது பயங்கரவாத தடைச் சட்டத்தின் தவறுகளை மீண்டும் செய்கிறது. இது நிறுத்தப்பட வேண்டும்,” என்று சிங் கூறினார்.

இந்தச் சட்டத்தை முழுமையாகத் திரும்பப் பெறுமாறும், அடிப்படை உரிமைகளைப் பாதுகாக்கும் அதே வேளையில் ஒழுங்கமைக்கப்பட்ட குற்றங்களை எதிர்த்துப் போராடுவதற்கான நடவடிக்கைகள் குறித்து அர்த்தமுள்ள பொது ஆலோசனைகளைத் தொடங்குமாறும் அனைத்துலக மன்னிப்புச் சபை, அரசாங்கத்தைக் கேட்டுக்கொண்டுள்ளது.