சிறிலங்காவின் முன்னாள் அதிபர்  மகிந்த ராஜபக்சவின் தலைமை பாதுகாப்பு அதிகாரி லெப்டினன்ட் கேணல் நெவில் வன்னியாராச்சியை, எதிர்வரும் 17 ஆம் திகதி வரை விளக்கமறியலில் வைக்க கொழும்பு தலைமை நீதிவான் அசங்க போதரகம   உத்தரவிட்டுள்ளார்.

சட்டவிரோதமாக,  வருமானத்திற்கு அதிகமாக 28 மில்லியன் ரூபா மதிப்புள்ள சொத்துக்களை குவித்ததாக அவர் மீது குற்றம்சாட்டப்பட்டு இலஞ்சம் மற்றும் ஊழல் குற்றச்சாட்டுகளை விசாரிக்கும் ஆணைக்குழுவால் நேற்று கைது செய்யப்பட்டிருந்தார்.

சொத்து விசாரணை தொடர்பாக வாக்குமூலம் பெறுவதற்காக இலஞ்சம் மற்றும்  ஊழல் குற்றச்சாட்டுகளை விசாரிக்கும் ஆணைக்குழுவின் முன் நேற்றுக்காலை  அழைக்கப்பட்ட  நெவில் வன்னியாராச்சி கைது செய்யப்பட்டு,அவரது வாக்குமூலம் பதிவு செய்யப்பட்டது.

இதையடுத்தே அவர் கைது செய்யப்பட்டு நீதிமன்றத்தில் முன்னிறுத்தப்பட்டிருந்தார்.

2014 ஜூலை 24 ஆம் திகதி இ லஞ்சம் மற்றும்  ஊழல் குற்றச்சாட்டுகளை விசாரிக்கும் ஆணைக்குழுவிற்கு கிடைத்த  முறைப்பாட்டைத் தொடர்ந்து இந்த விசாரணை தொடங்கப்பட்டது.

2016 ஆம் ஆண்டு முதல் இந்த விசாரணை தொடர்பாக நெவில் வன்னியாராச்சியிடம் தகவல் கோரப்பட்ட போதிலும், அவர் தொடர்ந்து தகவல்களை வழங்கத் தவறிவிட்டார் என்று ஆணைக்குழு தெரிவித்துள்ளது.

சந்தேக நபர் நெவில் வன்னியாராச்சி நீண்ட காலமாக விசாரணைக்கு ஒத்துழைக்கவில்லை என்பதையும், சொத்துக்கள் தொடர்பான ஐந்து வழக்குகளில் அவர் குற்றத்தை ஒப்புக்கொண்டதையும், உத்தரவுகளுக்கு அவர் தொடர்ந்து கீழ்ப்படியாததையும் கருத்தில் கொண்டு, அவரை விளக்கமறியலில் வைக்க நீதிவான் உத்தரவிட்டார்.

சந்தேக நபர் சட்டவிரோதமாக சம்பாதித்ததாகக் கூறப்படும் சொத்து குறித்து, வரும் நாட்களில் நீதிமன்றத்தில் விரிவான அறிக்கையை தாக்கல் செய்யுமாறும் நீதிவான், இலஞ்ச மற்றும் ஊழல் குற்றச்சாட்டுகளை விசாரிக்கும்  ஆணையக்குழுவிற்கு உத்தரவிட்டார்.

சந்தேக நபர் 2014 ஆம் ஆண்டுக்கான சொத்துக்கள் மற்றும் பொறுப்புகள் அறிவிப்புகளை வழங்கவில்லை என்றும், எட்டு ஆண்டுகளாக நடைபெற்று வரும் விசாரணையிலிருந்து பலமுறை தப்பித்து வந்ததாகவும் ஆணைக்குழு நீதிமன்றத்திற்குத் தெரிவித்தது.

“சந்தேக நபருக்கு வலஸ்முல்லவில் 3.7 ஏக்கர் நிலம், ஒரு எரிபொருள் நிரப்பு நிலையம்மற்றும் பல்லேகலையில் ரூ. 4.5 மில்லியன் மதிப்புள்ள ஒரு வீடு உள்ளது.

“மஹரகம, நாவின்னவில் 125 மில்லியன் ரூபா மதிப்புள்ள வீடும், தெமட்டகொடவில் 15 மில்லியன் ரூபா மதிப்புள்ள வீடும் உள்ளது.

சந்தேக நபர் திஸ்ஸமஹாராமவில் 45.5 பேர்ச்சஸில் ஒரு விடுதியைக் கட்டி வருகிறார்.

10 பேருந்துகள், 8 பாரஊர்திகளும், 32 வங்கிகளிலும், 47 நிதி நிறுவனங்களிலும், வைப்புகளும் உள்ளன.

அதே நேரத்தில் மடிவெல, கோட்டேயில் நான்கு லட்சம் ரூபாய் மதிப்புள்ள நிலமும், பெலியத்த மற்றும் வீரகெட்டிய பகுதிகளில் குத்தகைக்கு எடுக்கப்பட்ட இரண்டு கடைகளும் இருப்பதாக விசாரணைகளில் தெரியவந்துள்ளது,” என்று இலஞ்ச ஒழிப்பு ஆணைக்குழு சந்தேக நபரை நீதிமன்றத்தில் முன்னிலைப்படுத்திய போது தெரிவித்துள்ளது.

முறைப்பாட்டின் அடிப்படையில் இந்த விசாரணை நடத்தப்படுகிறது.

அந்த முறைப்பாட்டின் அடிப்படையில், டிசம்பர் 2016 முதல் ஜனவரி 2017 வரை சொத்துக்கள் மற்றும் பொறுப்புகளை வழங்குமாறு ஆணைக்குழு சந்தேக நபரிடம் தெரிவித்தது.

அதன்படி, ஏழு மாதங்களுக்குப் பின்னர் அவரால்  வழங்கப்பட்ட தகவல்களை ஆராய்ந்ததில், அது உண்மையல்ல என்று தெரியவந்தது.

சந்தேக நபருக்கு உண்மையான தகவல்களை வழங்குமாறு மீண்டும் அறிவிக்கப்பட்ட போதிலும், அவர் அதை வழங்கவில்லை.

கடந்த எட்டு ஆண்டுகளில் வருமானம் மற்றும் செலவு பதிவுகள் மற்றும் சொத்துக்கள் தொடர்பாக பல சந்தர்ப்பங்களில் விசாரணைகள் நடத்தப்பட்ட போதிலும், 2025 ஓகஸ்ட் வரை முழுமையான தகவல்கள் வழங்கப்படவில்லை.

2013.01.01 முதல் 2014.1.24 வரை சந்தேக நபர் தனது வருமானத்தை விட 28 மில்லியன் ரூபா அதிகமாக சம்பாதித்ததாக ஆணைக்குழு நடத்திய விசாரணையில் தெரியவந்துள்ளது.

நீண்டகாலத்திற்குப் பின்னர் தகவல் சமர்ப்பிக்கப்பட்ட போதிலும், விசாரணையில் தகவல் தவறானது மற்றும் முழுமையற்றது என்பது தெரியவந்தது.

சந்தேக நபரிடம் மீண்டும் ஒரு பிரமாணப் பத்திரம் வழங்குமாறு கேட்கப்பட்ட போதிலும், சந்தேக நபர் தகவலை வழங்கத் தவறியதால் 26.09.2025 அன்று வருமாறு கேட்கப்பட்டிருந்த போதிலும், சந்தேக நபர் மீண்டும் ஒரு வாக்குமூலம் அளிக்க அவகாசம் கோரியுள்ளார்.

விசாரணைக்கு உதவுவதற்குப் பதிலாக, சந்தேக நபர் எட்டு ஆண்டுகளாக தொடர்ந்து அவகாசம் கேட்டு வருகிறார்.

அதன்படி, ஆணைக்குழு அதிகாரிகள் குழு ஒன்று அத்தநாயக்க, மெதமுலானாவில் உள்ள சந்தேக நபரின் வீட்டிற்குச் சென்ற போது, சந்தேக நபர் அங்கு இல்லை.

சந்தேக நபரை தொலைபேசி மூலம் தொடர்பு கொள்ள முயற்சிகள் மேற்கொள்ளப்பட்டன, ஆனால் தொலைபேசி துண்டிக்கப்பட்டது.

ஒரு கட்டத்தில், தொலைபேசி இயக்கப்பட்டது, மேலும் சந்தேக நபர் அழைப்பு இணைக்கப்பட்ட 52 வினாடிகளுக்குள் மற்றொரு திகதியைக் கோரினார்.

அதன்படி, நேற்று  வருமாறு அவருக்கு ஒரு கடிதம் வழங்கப்பட்டது.

சந்தேக நபரிடம் 2014 முதல் அவர் வெளியிடாத பல சொத்துக்கள் இருப்பதாக விசாரணைகளில் தெரியவந்துள்ளது.

சந்தேக நபருக்குச் சொந்தமான மேற்கண்ட சொத்து குறித்து விரிவான விசாரணை நடத்தப்பட வேண்டும்.

2017 முதல் 2025 வரை அவரிடம் உள்ள  பேருந்துகளில் பணிபுரிந்தவர்கள் பற்றிய தகவல்கள் கோரப்பட்டாலும், அது வழங்கப்படவில்லை.

2015 இல் அவர் சில தகவல்களை வழங்கிய போதிலும், பேருந்துகளில் பணிபுரிந்த இரண்டு பேரைத் தவிர, மற்றவர்கள் உறவினர்கள் மற்றும் நண்பர்கள் என்று அவர் கூறியுள்ளார்.

அவர்களின் வாக்குமூலங்களைப் பதிவு செய்து விசாரிக்க வேண்டும்.

விசாரணையைத் தடுக்கவும் ஒத்திவைக்கவும் முயற்சிகள் மேற்கொள்ளப்பட்டுள்ளன.

இதுவரை நடத்தப்பட்ட விசாரணையில் 28 மில்லியன் எவ்வாறு சம்பாதித்தது என்பது குறித்து எந்த தகவலும் இல்லை.

நிலப் பதிவு அலுவலகங்களிலிருந்து ஏராளமான தொடர்புடைய வங்கி பதிவுகள் மற்றும் ஆவணங்களை ஆலோசிக்க வேண்டும் என்றும் ஆணைக்குழு அதிகாரிகள் நீதிமன்றில் தெரிவித்துள்ளார்.