பிம்ஸ்டெக் அமைப்பின் சுகாதார அமைச்சர்களின்  முதலாவது கூட்டத்தில் பங்கேற்பதற்காக, இந்தியாவின் மத்திய சுகாதார மற்றும் குடும்ப நலத்துறை அமைச்சர் ஜே. பி. நட்டா, நேற்று சிறிலங்காவை வந்தடைந்துள்ளார்.

சிறிலங்காவுக்கான  இந்திய தூதுவர் சந்தோஷ் ஜா,  இந்திய சுகாதார அமைச்சர் ஜே.பி.நட்டாவை கட்டுநாயக்க விமான நிலையத்தில் வரவேற்றார்.

இது குறித்து தனது ‘எக்ஸ்’ (X) தளத்தில் பதிவிட்டுள்ள அவர், “பிம்ஸ்டெக் அமைப்பின் வரலாற்றுச் சிறப்புமிக்க முதல் சுகாதார அமைச்சர்கள் கூட்டத்தில் பங்கேற்க கொழும்பு நகரை வந்தடைந்தேன்.

பிம்ஸ்டெக் உறுப்பு நாடுகளைச் சேர்ந்த எனது சக அமைச்சர்களுடன் இணைந்து, பிராந்திய சுகாதார ஒத்துழைப்பை வலுப்படுத்தவும், பொது சுகாதார முன்னுரிமைகளை முன்னெடுத்துச் செல்லவும், சுகாதாரத் துறையில் கூடுதல் ஒத்துழைப்பை வளர்க்கவும் ஆவலுடன் காத்திருக்கிறேன்” என்று பதிவிட்டுள்ளார்.

“பிரதமர் நரேந்திர மோடியின் ‘அண்டை நாடுகளுக்கு முன்னுரிமை’ (Neighbourhood First) மற்றும் ‘கிழக்கு நோக்கிய செயல்பாடு’ (Act East) கொள்கைகளின் வழிகாட்டுதலின்படி, ஆரோக்கியமான, அதிக மீள்தன்மை கொண்ட மற்றும் வளமான பிம்ஸ்டெக் பிராந்தியத்தை உருவாக்குவதில் இந்தியா உறுதியாக உள்ளது” என்றும் அவர் குறிப்பிட்டுள்ளார்.

இந்திய மத்திய சுகாதாரம் மற்றும் குடும்ப நல அமைச்சகம் வெளியிட்டுள்ள தகவலின்படி, நட்டாவின் இந்த பயணம், பிராந்திய சுகாதார ஒத்துழைப்பை வலுப்படுத்துவதற்கும், பொது சுகாதார முன்னுரிமைகளை முன்னெடுத்துச் செல்வதற்கும், சிறிலங்கா மற்றும் பிற பிம்ஸ்டெக் உறுப்பு நாடுகளுடன் இந்தியாவின் சுகாதாரக் கூட்டாண்மையை ஆழப்படுத்துவதற்கும் ஒரு “முக்கியமான படியாகும்.

பிம்ஸ்டெக் சுகாதார அமைச்சர்களின் முதல் கூட்டத்திற்கான தயாரிப்புகளின் ஒரு பகுதியாக, சுகாதாரத்துறை சார்ந்த பிம்ஸ்டெக் மூத்த அதிகாரிகளின் கூட்டம் செவ்வாய்க்கிழமை கொழும்பில் தொடங்கியது.

பிராந்திய அளவில் பொதுவான சுகாதார சவால்களைக் கண்டறிதல், கூட்டு நடவடிக்கைகளை வலுப்படுத்துதல் மற்றும் உறுப்பு நாடுகளிடையே தொழில்நுட்ப நிபுணத்துவத்தைப் பரிமாறிக்கொள்ளுதல் போன்றவை குறித்து இந்தக் கூட்டத்தில் ஆராயப்படுகின்றன.

இந்தக் கூட்டத்தில், தொற்று நோய்கள் மற்றும் பெருந்தொற்றுகளைத் தடுப்பது மற்றும் கட்டுப்படுத்துவது, பொது சுகாதார அவசரநிலைகளுக்குத் தயாராகுதல் மற்றும் பதிலளித்தல், நோய் கண்காணிப்பு அமைப்புகளை வலுப்படுத்துதல், மற்றும் சுகாதார அமைப்புகளின் மீள்தன்மையை (resilience) மேம்படுத்துதல் உள்ளிட்ட அம்சங்கள் குறித்து கலந்துரையாடப்படவுள்ளன.

இந்த கலந்துரையாடல்கள் டிஜிட்டல் சுகாதாரப் பராமரிப்பு, மருத்துவ ஆராய்ச்சி, நுண்ணுயிர் எதிர்ப்புத் திறன், பருவநிலை மாற்றத்தால் ஆரோக்கியத்தில் ஏற்படும் தாக்கங்கள், மனித மற்றும் விலங்கு ஆரோக்கியத்திற்கு இடையிலான தொடர்பை அங்கீகரிக்கும் ‘ஒரே சுகாதாரம்’ (One Health) அணுகுமுறை, மற்றும் பாரம்பரிய மருத்துவத்தை ஊக்குவித்தல் ஆகிய அம்சங்களையும் உள்ளடக்கும்.