அனைத்துலக மனித உரிமைகள் சட்டங்களுக்கு இணக்கமாக இருப்பதை உறுதிசெய்யும் வகையில்,  பயங்கரவாதத்திலிருந்து அரசைப் பாதுகாக்கும் சட்ட மூலத்தை சிறிலங்கா அரசாங்கம் திருத்தியமைக்க வேண்டும் என ஐ.நா. நிபுணர்கள் வலியுறுத்தியுள்ளனர்.

ஐ.நா மனித உரிமைகள் ஆணையாளர் பணியகத்தினால் வெளியிடப்பட்டுள்ள அறிக்கையில் அவர்கள் இதனை தெரிவித்துள்ளனர்.

“சிறிலங்காவில் 26 ஆண்டுகள் நீடித்த கொடூரமான உள்நாட்டுப் போருக்கு முன்னரும், போரின் போதும், போருக்குப் பின்னரும், சிறுபான்மையினர், மனித உரிமைப் பாதுகாவலர்கள், ஊடகவியலாளர்கள் மற்றும் சிவில் சமூகம் ஆகியோருக்கு எதிரான துஷ்பிரயோகங்கள் உட்பட, சித்திரவதை மற்றும் கட்டாயக் காணாமல் போதல் போன்ற பல கடுமையான மனித உரிமை மீறல்களுக்கு வழிவகுத்த, 1979 ஆம் ஆண்டின் பயங்கரவாதத் தடுப்புச் சட்டத்தை ரத்து செய்வதற்கான முன்மொழிவை நாங்கள் வரவேற்கிறோம்,” என்று ஐ.நா நிபுணர்கள் கூறியுள்ளனர்.

எனினும், சிறிலங்கா அரசாங்கம்  முன்வைத்துள்ள பயங்கரவாதத்தில் இருந்து அரசைப் பாதுகாக்கும் சட்ட வரைவில், சில முக்கியக் கவலைகள் இன்னும் நிவர்த்தி செய்யப்பட வேண்டியுள்ளது என்றும் அவர்கள் வலியுறுத்தியுள்ளனர்.

தடுப்புக்காவல் உத்தரவுகள் உடனடி மற்றும் பயனுள்ள நீதித்துறை கட்டுப்பாடு மற்றும் மேற்பார்வைக்கு உட்பட்டதாக இருக்க வேண்டும் என்றும்  ஐ.நா நிபுணர்கள் கூறியுள்ளனர்.

“தடுப்புக்காவல் மேல்முறையீடுகளை விசாரிக்கும் சுயாதீன மறுஆய்வுக் குழு உண்மையாகவே சுதந்திரமானதாகவும், அதன் முடிவுகள் கட்டுப்படுத்தும் தன்மையுடையதாகவும் இருக்க வேண்டும்,” என்று அவர்கள் தெரிவித்துள்ளனர்.

“தடுத்துவைக்கப்பட்டவர்களுக்கு சட்ட ஆலோசனை, மொழிபெயர்ப்பு, சுதந்திரமான மருத்துவப் பரிசோதனை, சட்ட உதவி, குடும்பத்தினருடனான தொடர்பு மற்றும் சிறிலங்கா மனித உரிமைகள் ஆணைக்குழுவின் உடனடி சந்திப்புகள் ஆகியவற்றுக்கான அணுகல் உறுதி செய்யப்பட வேண்டும்,” என்று ஐ.நா நிபுணர்கள் கூறியுள்ளனர்.

“கட்டாயமாகக் காணாமல் போவதையும், வெளி உலகத் தொடர்பின்றி தடுத்து வைப்பதையும் தடுப்பதற்காக, தடுப்புக்காவலில் இருந்து செய்யப்படும் இடமாற்றங்கள் பதிவு செய்யப்பட்டு அறிவிக்கப்பட வேண்டும்.”

பயங்கரவாதத்தின் வரையறையானது, வேண்டுமென்றே மரணம் அல்லது கடுமையான காயத்தை ஏற்படுத்தும் செயல்களுக்கு மட்டுமே வரையறுக்கப்பட வேண்டும் என்றும், வெறும் சொத்து சேதத்தை விலக்க வேண்டும் என்றும் அவர்கள் வலியுறுத்தியுள்ளனர்.

“கருத்து வெளிப்பாடு தொடர்பான குற்றங்கள், பயங்கரவாத வன்முறையை ஏற்படுத்தும் சாத்தியக்கூறைக் கொண்டிருக்க வேண்டும்,” என்று  ஐ.நா நிபுணர்கள் கூறியுள்ளனர்.

இராணுவ மீறல்களின் வரலாற்றைக் கருத்தில் கொண்டு, தவறான பயன்பாட்டைத் தடுப்பதற்காக ஆயுதப் படைகளின் கைது, விசாரணை மற்றும் சோதனை அதிகாரங்கள் ஒழிக்கப்பட வேண்டும் என்றும் ஐ.நா நிபுணர்கள் அழைப்பு விடுத்துள்ளனர்.

மேலும், பயங்கரவாதக் குற்றங்களைத் தடுப்பதற்கான அதிகாரங்கள் கடுமையாக்கப்பட்டு, நீதித்துறை மேற்பார்வைக்கு உட்படுத்தப்பட வேண்டும் என்றும் அவர்கள் எச்சரித்தனர்.

அமைப்புகளைத் தடை செய்வதற்கான அளவுகோல்களும் வரம்புகளும் தெளிவுபடுத்தப்பட்டு உயர்த்தப்பட வேண்டும்; தடை உத்தரவுகளுக்குக் கால வரம்புகள் விதிக்கப்பட வேண்டும்; கட்டுப்பாட்டு உத்தரவுகள் மற்றும் இடங்களைத் தடை செய்யும் அதிகாரங்களுக்கு ஒட்டுமொத்த கால வரம்புகள் விதிக்கப்பட வேண்டும்.என்றும் ஐ.நா நிபுணர்கள் வலியுறுத்தியுள்ளனர்.

வலுவான நடைமுறைப் பாதுகாப்புகளுக்கும் ஐ.நா நிபுணர்கள் அழைப்பு விடுத்தனர்.

சட்டவிரோதமாக, சித்திரவதை அல்லது கொடுமைப்படுத்துதல் மூலம் பெறப்பட்ட அனைத்து ஆதாரங்களும் அல்லது வாக்குமூலங்களும் நடவடிக்கைகளிலிருந்து விலக்கப்பட வேண்டும்.

பாதுகாப்பு காரணங்களுக்காக ஆதாரங்களை வெளியிடாமல் இருப்பது தொடர்பான சட்ட நடைமுறை வலுப்படுத்தப்பட வேண்டும்.

பத்திரிகைத் தகவல்கள், சட்டப்பூர்வ சிறப்புரிமை, தொழில்முறை இரகசியத்தன்மை மற்றும் மனித உரிமைக் கண்காணிப்பு தொடர்பான தகவல்கள் வெளிப்படுத்தப்படுவதிலிருந்து பாதுகாக்கப்பட வேண்டும் என்றும் அவர்கள் குறிப்பிட்டுள்ளனர்.

“சட்டம் எவ்வாறு நடைமுறைப்படுத்தப்படும் என்பதை வழிநடத்தும் சிறிலங்கா அதிபரின் அதிகாரம் கட்டுப்படுத்தப்பட வேண்டும், மேலும் பயங்கரவாதத் தடுப்புச் சட்டம்  நடைமுறைக்கு வந்த பிறகு, பயங்கரவாதத் தடுப்புச் சட்டம் இடைக்காலமாகப் பொருந்தக்கூடாது.”

“பயங்கரவாதத் தடுப்புச் சட்டத்தின் கீழ் மனித உரிமைகள் மற்றும் சட்ட அதிகார மீறல்களுக்கு எதிராக அரசாங்கம் மேற்பார்வை, பொறுப்புக்கூறல் மற்றும் உடனடியான, பயனுள்ள தீர்வுகளை வலுப்படுத்த வேண்டும்.

தடுப்புக்காவலில் இருந்து விடுதலையை உறுதி செய்தல், ஆதாரங்களை நிராகரித்தல், அதிகாரிகளின் ஒழுங்கு நடவடிக்கை அல்லது குற்றவியல் பொறுப்பு, மற்றும் பாதிக்கப்பட்டவர்களுக்கு இழப்பீடு, மறுவாழ்வு, மன்னிப்பு மற்றும் மீண்டும் நிகழாது என்பதற்கான உத்தரவாதங்கள் போன்ற பரிகாரங்களை வழங்குதல் ஆகியவை இதில் அடங்கும்,” என்றும் ஐ.நா நிபுணர்கள் கூறியுள்ளனர்.

“தவறான செயல்களுக்காக அதிகாரிகளுக்கு பயங்கரவாதத் தடுப்புச் சட்டம் விலக்கு அளிப்பது ஏற்றுக்கொள்ள முடியாதது,” என்றும் அவர்கள் குறிப்பிட்டுள்ளனர்.

“மனித உரிமைகள் மதிக்கப்பட்டால் மட்டுமே பயங்கரவாதத்தை எதிர்ப்பது பயனுள்ளதாக இருக்கும்.” என்றும் ஐ.நா நிபுணர்கள் கூறியுள்ளனர்.

“பயங்கரவாதத் தடுப்புச் சட்டத்தின் முந்தைய வரைவு குறித்த கவலைகளை நிபுணர்கள் அரசாங்கத்திடம் தெரிவித்துள்ளனர், மேலும் சிவில் சமூகம் உள்ளிட்ட சம்பந்தப்பட்ட தரப்பினருடன் கலந்தாலோசனை நடத்தவும் அழைப்பு விடுத்துள்ளனர்.”

சட்டமூலத்தை திருத்துவதற்கான தொழில்நுட்ப உதவிகளை வழங்கவும் ஐ.நா நிபுணர்கள் முன்வந்துள்ளனர்.

இந்த அறிக்கையில் ஒப்பமிட்டுள்ள ஐ.நா நிபுணர்கள்-

1. பயங்கரவாதத்தை எதிர்கொள்ளும் அதே வேளையில் மனித உரிமைகள் மற்றும் அடிப்படை சுதந்திரங்களை மேம்படுத்துதல் மற்றும் பாதுகாத்தல் தொடர்பான சிறப்பு அறிக்கையாளர் பென் சால்
2. நீதிமன்றத்திற்கு அப்பாற்பட்ட, சுருக்கமான அல்லது தன்னிச்சையான மரணதண்டனைகள் தொடர்பான சிறப்பு அறிக்கையாளர் மோரிஸ் டிட்பால்-பின்ஸ்
3. கருத்து மற்றும் வெளிப்பாட்டுச் சுதந்திரத்திற்கான உரிமையை மேம்படுத்துதல் மற்றும் பாதுகாத்தல் தொடர்பான சிறப்பு அறிக்கையாளர் லியோபோல்டோ மால்டொனாடோ குட்டிரெஸ்.
4. மனித உரிமைப் பாதுகாவலர்களின் நிலைமை தொடர்பான சிறப்பு அறிக்கையாளர் அண்ட்ரியா போலானோஸ் வர்காஸ்.
5. தன்னிச்சையான தடுப்புக்காவல் மீதான பணிக்குழுவின் மத்யூ கில்லெட், ஈதன் ஹீ-சியோக் ஷின் (பின்தொடர்தல் குழுவின் துணைத் தலைவர்) மற்றும் நிக்கோலஸ் லைனோ.
6. கட்டாய அல்லது தன்னிச்சையற்ற காணாமல் போதல்கள் மீதான பணிக்குழுவின் கிராஸினா பரனோவ்ஸ்கா (தலைவர்-அறிக்கையாளர்), அனா லோரெனா டெல்காடில்லோ பெரெஸ் (துணைத் தலைவர்), கப்ரியெல்லா சிட்ரோனி, முகமட் அல்-ஒபைடி மற்றும் அஞ்சலி பாரின்.
7. சித்திரவதை  மற்றும் பிற கொடூரமான, மனிதாபிமானமற்ற அல்லது இழிவுபடுத்தும் விதமான நடத்தைகள் அல்லது தண்டனைகள் மீதான சிறப்பு அறிக்கையாளர் பாவ் பெரெஸ் சேல்ஸ்.
8. நீதிபதிகள் மற்றும் வழக்கறிஞர்களின் சுதந்திரம் குறித்த சிறப்பு அறிக்கையாளர் மார்கரெட் சாட்டர்த்வைட்.