சிறிலங்கா அரசாங்கத்தினால் முன்மொழியப்பட்டுள்ள ஒழுங்கமைக்கப்பட்ட குற்றத் தடுப்புச் சட்டம், ஒழுங்கமைக்கப்பட்ட குற்றங்களை எதிர்த்துப் போராடுவதற்குப் பதிலாக, எதிர்ப்புகளை அடக்குவதற்குப் பயன்படுத்தப்படலாம் என்று, முன்னிலை சோசலிசக் கட்சி தெரிவித்துள்ளது.

நுகேகொடவில் கட்சி பணியகத்தில் நடந்த ஊடக சந்திப்பில் உரையாற்றிய முன்னிலை சோசலிச கட்சியின் கல்விச் செயலாளர் புபுது ஜயகொட,

ஒக்டோபர் 6 ஆம் நாள் அரசிதழில் வெளியிடப்பட்ட இந்த சட்டமூலம் அரசின் அடக்குமுறை அதிகாரங்களை விரிவுபடுத்தும்.

குடிமக்கள் உரிமைகள் மீதான அரசாங்கத்தின் அணுகுமுறையை மதிப்பிடும்போது, ​​ஒழுங்கமைக்கப்பட்ட குற்றத் தடுப்பு சட்டமூலம்,  பயங்கரவாதத்தில் இருந்து அரசைப் பாதுகாக்கும் சட்டமூலம், மற்றும் 22வது திருத்தம் ஆகியவற்றை ஒன்றாகக் கருத்தில் கொள்ள வேண்டும்.

சட்டமூலத்தில் உள்ள “ஒழுங்கமைக்கப்பட்ட குற்றக் குழு” என்பதற்கான வரையறை, தன்னிச்சையான விளக்கத்திற்கு இடமளிக்கும் அளவுக்கு பரந்ததாக உள்ளது.

நிதி அல்லது பிற பொருள் ஆதாயத்திற்காக ஒன்று அல்லது அதற்கு மேற்பட்ட கடுமையான குற்றங்களைச் செய்ய, ஒரு குறிப்பிட்ட காலத்திற்கு ஒன்றாகச் செயல்படும் மூன்று அல்லது அதற்கு மேற்பட்ட நபர்களைக் கொண்ட ஒரு கட்டமைக்கப்பட்ட குழுவே அத்தகைய குழு என அது வரையறுக்கிறது.

நான்கு ஆண்டுகள் அல்லது அதற்கு மேற்பட்ட சிறைத் தண்டனை விதிக்கக்கூடிய குற்றம் “கடுமையான குற்றம்” என வரையறுக்கப்பட்டுள்ளதுடன், காவல் அதிகாரியைத் தடுத்தல், திருட்டு, பதிப்புரிமை மீறல், உரிமம் இல்லாத சூதாட்டம் மற்றும் விலங்குகள் மற்றும் தாவரங்கள் பாதுகாப்பு கட்டளைச் சட்டத்தின் கீழ் வரும் சில குற்றங்கள் போன்ற குற்றங்கள் இந்த அட்டவணையில் அடங்கும்.

பிரிவு 4(2)  அத்தகைய குழுக்களுடன் தொடர்புடையதாகக் கூறப்படும் உடை, சைகைகள், மொழி அல்லது பச்சை குத்துதல் ஆகியவற்றின் அடிப்படையில் ஒரு நபரை குற்றக் குழுவின் உறுப்பினராக அடையாளம் காண அனுமதிக்கக்கூடும் .

அதன் விளைவாக, நீண்ட முடி அல்லது பச்சை குத்தியுள்ள இளைஞர்கள் தன்னிச்சையான கைது மற்றும் தடுப்புக்காவலை எதிர்கொள்ள நேரிடும்.

இந்த சட்டமூலத்தில் தனிநபர் சுதந்திரம் குறித்து கடுமையான கவலைகளை எழுப்பும் பல விதிகள் உள்ளன.

பிரிவு 20(1)-இன் கீழ், ஒரு சந்தேக நபரை நீதிபதி முன் நிறுத்தாமல் 72 மணி நேரம் வரை காவல்துறை காவலில் வைக்க முடியும்.

பிரிவு 21, பொதுப் பாதுகாப்பு அமைச்சின் செயலாளருக்கோ அல்லது காவல்துறைக்குப் பொறுப்பான அமைச்சிற்கோ, காவல்துறையின் கோரிக்கையின் பேரில், ஒரு நேரத்தில் இரண்டு மாதங்கள் முதல் அதிகபட்சமாக ஒரு ஆண்டு வரை தடுப்புக் காவல் உத்தரவுகளைப் பிறப்பிக்க அனுமதிக்கும்.

முன்மொழியப்பட்ட சட்டத்தின் கீழ் கைது செய்யப்பட்ட ஒருவருக்குப் பிணை வழங்குவதற்கான நீதிபதியின் அதிகாரத்தை பிரிவு 23 நீக்குகிறது.

அதே நேரத்தில், நீதிமன்றத்தால் காவலில் வைக்கப்பட்ட ஒரு சந்தேக நபரை ஆறு மாதங்கள் வரை காவல் நிலையத்தில் தனிமைப்படுத்தி வைக்க பிரிவு 25 அனுமதிக்கும்.

ஒரு சந்தேக நபர் காவல்துறையிடம் அளித்த வாக்குமூலத்தை அவருக்கு எதிரான ஆதாரமாகப் பயன்படுத்த அனுமதிக்கும் ஒரு விதியை, பிரிவு 47 திறம்பட மீண்டும் அறிமுகப்படுத்துகிறது.

நாட்டில் அச்சமூட்டும் சூழலை உருவாக்க அரசாங்கம் முயற்சிக்கிறது.

முன்மொழியப்பட்ட சட்டங்கள் அவற்றின் தலைப்புகளின் அடிப்படையில் அல்லாமல், அவற்றின் உண்மையான விதிகளின் அடிப்படையில் ஆராயப்பட வேண்டும்.

பேசுவதற்கு முன் “இரண்டு முறை சிந்திக்க வேண்டும்” என்று சமூக ஊடகப் பதிவில் அண்மையில் காவல்துறை மக்களை வலியுறுத்தியது.

இது கருத்துச் சுதந்திரத்தின் மீதான அரசாங்கத்தின் அர்ப்பணிப்பை கேள்விக்குட்படுத்துகிறது.

இது பொதுமக்களின் எதிர்ப்பை அடக்கும் முயற்சிகளாகும், இத்தகைய நடவடிக்கைகளை மக்கள் எதிர்க்க வேண்டும்.

இந்த சட்டமூலங்களையோ அவற்றின் பெயர்களையோ அல்லது அட்டைப்படங்களையோ வைத்து மதிப்பிடாதீர்கள். அவற்றின் உண்மையான நோக்கத்தையும் உள்ளடக்கத்தையும் நாம் ஆராய வேண்டும்,” என்றும்  கூறினார்.