ஒழுங்கமைக்கப்பட்ட குற்றத் தடுப்பு சட்டமூலம், பச்சை குத்திக்கொள்வது, நீண்ட முடி வைத்திருப்பது அல்லது குறிப்பிட்ட ஆடை அலங்காரங்களைக் கொண்டிருப்பது போன்ற காரணங்களுக்காக மட்டும் தனிநபர்களைக் கைது செய்ய அனுமதிக்கும் என்ற குற்றச்சாட்டுகளை, சிறிலங்காவின் நீதி அமைச்சர் ஹர்ஷன நாணயக்கார நிராகரித்துள்ளார்.

நேற்று நாடாளுமன்றத்தில் உரையாற்றிய அமைச்சர், முன்மொழியப்பட்ட சட்டத்தைப் பற்றிய தவறான விளக்கங்கள் சமூக ஊடகங்களில் பரவி, பொதுமக்களிடையே தேவையற்ற அச்சத்தை ஏற்படுத்துகிறது.

பச்சை குத்திக்கொள்வதற்காகவோ அல்லது குறிப்பிட்ட சிகை அலங்காரங்களை மேற்கொள்வதற்காகவோ மக்கள் சிறையில் அடைக்கப்படலாம் என்று சிலர் தவறாகக் கூறி வருகின்றனர்.

உங்களுக்கு விருப்பமான ஆடைகளை அணிவது, பச்சை குத்திக்கொள்வது அல்லது நீங்கள் விரும்பும் சிகை அலங்காரத்தைக் கொண்டிருப்பது ஆகியவை அடிப்படை உரிமைகள்.

முன்மொழியப்பட்ட சட்டப் பிரிவு 4(2) தனிநபர் ஒழுங்கமைக்கப்பட்ட குற்றக் குழுவைச் சேர்ந்தவரா என்பதைத் தீர்மானிக்கும்போது கருத்தில் கொள்ளக்கூடிய 12 காரணிகளை அது கோடிட்டுக் காட்டுகிறது.

ஒரு காரணி என்பது, ஒழுங்கமைக்கப்பட்ட குற்ற அமைப்புகளின் அறியப்பட்ட உறுப்பினர்களால் பொதுவாகப் பயன்படுத்தப்படும் ஆடை பாணிகள், கை சைகைகள், மொழி அல்லது பச்சை குத்துதல் ஆகியவற்றைக் குறிக்கிறது.

இருப்பினும், இவை தனிப்பட்ட குற்றச் செயல்கள் அல்ல. இந்த விதிமுறை சாதாரண தனிநபர்களின் தோற்றத்தைப் பற்றியது அல்ல, மாறாக ஒழுங்கமைக்கப்பட்ட குற்றக் குழுக்களில் சந்தேகிக்கப்படும் உறுப்பினர் நிலையைப் பற்றியது.

இந்த விதிமுறை ஒரு “மறுக்கக்கூடிய அனுமானம்”, இது குற்றச் செயல்களில் ஈடுபட்டதற்கான உறுதியான சான்றாக அமையாது.

ஜப்பான், அமெரிக்கா, அவுஸ்ரேலியா மற்றும் சிங்கப்பூர் உள்ளிட்ட நாடுகளில் , கும்பல் உறுப்பினர்களை அடையாளம் காண புலனாய்வாளர்களால் அனைத்துலக அளவில் இதேபோன்ற குறிகாட்டிகள் பயன்படுத்தப்படுகின்றன.

முன்மொழியப்பட்ட இந்தச் சட்டம், ஒழுங்கமைக்கப்பட்ட குற்றங்கள், போதைப்பொருள் கடத்தல், கொலைகள், கடத்தல்கள் மற்றும் பிற கடுமையான குற்றங்களுக்கு எதிரான சட்டத்தை நடைமுறைப்படுத்துவதை வலுப்படுத்தும் நோக்கத்தைக் கொண்டுள்ளது.

ஒழுங்கமைக்கப்பட்ட குற்ற வலையமைப்புகளுடன் தொடர்புடைய சில நடவடிக்கைகளைத் திறம்பட விசாரிக்கவும், வழக்குத் தொடரவும் தற்போதுள்ள சட்டம் போதுமானதாக இல்லை.

இந்த இந்த சட்டமூலம் தொடர்பான விமர்சனங்களை நாடாளுமன்ற விவாதங்களின் போது கருத்தில் கொள்ள அரசாங்கம் தயாராக உள்ளது.

இந்தச் சட்டம் அரசியலமைப்பு உரிமைகளை மீறுவதாக நம்புபவர்கள், அதை உச்ச நீதிமன்றத்தில் எதிர்த்து வழக்குத் தொடரலாம்.

சில அரசியல் குழுக்களும் சமூக ஊடக வர்ணனையாளர்களும், முன்மொழியப்பட்ட சட்டத்தை அரசியல் நோக்கங்களுக்காக வேண்டுமென்றே தவறாகச் சித்திரிக்கின்றனர்.

பச்சை குத்திக்கொள்வது, தலைமுடியை வளர்ப்பது அல்லது குறிப்பிட்ட ஆடைகளை அணிவது போன்ற காரணங்களுக்காக மட்டும் தனிநபர்கள் மீது குற்றவியல் வழக்குகள் தொடரப்படாது என்றும் அமைச்சர் மீண்டும் வலியுறுத்தினார்.