கொழும்புத் துறைமுகத்தில் முன்மொழியப்பட்ட 392 மில்லியன் அமெரிக்க டொலர் மதிப்பிலான விநியோக மையத் திட்டத்தில் இருந்து, சீனாவின் மேர்ச்சண்ட்ஸ் போர்ட் ஹோல்டிங்ஸ் நிறுவனம் விலகியுள்ளது.

இந்தத் திட்டம் ரத்து செய்யப்பட்டதைத் தொடர்ந்து, சிறிலங்கா துறைமுக  அதிகாரசபை 21.9 மில்லியன் அமெரிக்க டொலர் இழப்பீட்டுத் தொகையை வழங்க ஒப்புக்கொண்டுள்ளது.

தெற்காசிய வர்த்தக மற்றும் விநியோக மையம் திட்டம் முடிவுக்கு வந்ததை, சீனத் துறைமுக நிறுவனம் 2026 ஒக்டோபர் 15ஆம் நாள் ஹொங்கொங் பங்குச் சந்தையில் தாக்கல் செய்த அறிக்கையில் உறுதிப்படுத்தியுள்ளது.

தெற்காசியாவின் மிகப்பெரிய விநியோக வளாகங்களில் ஒன்றாக முதலில் திட்டமிடப்பட்டிருந்த இந்தத் திட்டம், 50 ஆண்டு கால ‘கட்டு-இயக்கு-மாற்று’ (build-operate-transfer) ஏற்பாட்டின் கீழ் உருவாக்கப்படவிருந்தது.

பங்குச் சந்தை அறிக்கையின்படி, வெளிப்புறச் சூழ்நிலைகளில் ஏற்பட்ட மாற்றங்கள், திட்டத்தின் செயலாக்கச் சூழல் மற்றும் கால அட்டவணையில் செய்யப்பட்ட மாற்றங்கள், மற்றும் சம்பந்தப்பட்ட தரப்பினரிடையே இருந்த வர்த்தகக் கருத்தாய்வுகள் ஆகியவற்றின் காரணமாக இந்தத் திட்டத்தைக் கைவிடும் முடிவு எடுக்கப்பட்டது.

சீன மெர்ச்சண்ட்ஸ் போர்ட் நிறுவனம் தனது துணை நிறுவனமான போர்ச்சூன் சென்டர் குரூப் லிமிடெட் மூலம் இந்தத் திட்டத்தில் 70% பங்குகளைக் கொண்டிருந்தது.

அதே நேரத்தில், சிறிலங்கா துறைமுக அதிகாரசபையும் அக்சஸ் இன்ஜினியரிங் பிஎல்சி நிறுவனமும் தலா 15% பங்குகளைக் கொண்டிருந்தன.

மூன்று பங்குதாரர்களும் இத்திட்டத்தில் மொத்தம் 37.14 மில்லியன் அமெரிக்க டொலர்களை முதலீடு செய்திருந்தனர்; இதில் சீன நிறுவனத்தின் துணை நிறுவனம் வழங்கிய 26 மில்லியன் அமெரிக்க டொலர் பங்களிப்பும் அடங்கும்.

தீர்வு ஒப்பந்தத்தின்படி, சிறிலங்கா துறைமுக அதிகார சபை 30 நாட்களுக்குள் திட்ட நிறுவனத்திற்கு 21,905 மில்லியன் அமெரிக்க டொலர்களைச் செலுத்தும்.

முன்மொழியப்பட்ட ஐந்து மாடி விநியோக வளாகத்திற்கு, 15 ஆண்டுகளுக்கு நிறுவன வருமான வரி மற்றும் ஈவுத்தொகை வரிகளிலிருந்து விலக்குகள் உட்பட பல வரிச் சலுகைகளை வழங்கும் வகையில், சிறிலங்காவினால் டிசம்பர் 2023-இல் மூலோபாய அபிவிருத்தித் திட்ட அந்தஸ்து வழங்கப்பட்டது.

இருப்பினும், இந்த திட்டம் தாமதங்களையும் செயல்படுத்துவதில் உள்ள சிக்கல்களையும் சந்தித்ததால், அது முதலில் திட்டமிட்டபடி முன்னேற முடியாமல் போனது.

திட்டம் ரத்து செய்யப்பட்டதைத் தொடர்ந்து, அந்த நிலத்திற்கு புதிய முதலீட்டு முன்மொழிவுகளை துறைமுக அதிகாரசபை கோரும் என எதிர்பார்க்கப்படுகிறது.