சிறிலங்கா விமானப்படைக்காக, இஸ்ரேல் ஏரோஸ்பேஸ் இண்டஸ்ட்ரீஸ் நிறுவனத்திடமிருந்து நான்கு ட்ரோன்களை கொள்வனவு செய்ய அரசாங்கம் திட்டமிட்டுள்ளதாக சிறிலங்காவின் பாதுகாப்பு பிரதி அமைச்சர் மேஜர் ஜெனரல் அருண ஜயசேகர தெரிவித்தார்.

சிறிலங்கா நாடாளுமன்றத்தில் இன்று, சிறிலங்கா விமானப்படைக்கு ரூ. 4.261 பில்லியன் ரூபாவை மேலதிகமாக ஒதுக்குவதற்கான குறைநிரப்பு பிரேரணை மீது உரையாற்றிய போதே அவர் இதனைக் குறிப்பிட்டுள்ளார்.

கடல்சார் கண்காணிப்பு மற்றும் பேரிடர் மீட்புத் திறன்களை வலுப்படுத்துவதற்காக, இஸ்ரேலிடமிருந்து 4,261 மில்லியன் ரூபாவுக்கு நான்கு மேம்பட்ட ஆளில்லா வான்வழி வாகனங்களை (UAVs) கொள்வனவு செய்ய சிறிலங்கா  அரசாங்கம் திட்டமிட்டுள்ளது.

இஸ்ரேல் ஏரோஸ்பேஸ் இண்டஸ்ட்ரீஸ் பங்கு மூலதனத்தைக் கொண்டுள்ள புளூபேர்ட் ஏரோ சிஸ்டம்ஸ் நிறுவனம் மூலம், அரசாங்கங்களுக்கு இடையேயான அடிப்படையில் இந்த அவசரகால கொள்வனவு செயற்படுத்தப்படும்.

இந்த ட்ரோன்கள் சிறிலங்காவின் தனித்துவ பொருளாதார வலயத்தை கண்காணிக்கும்.

இந்த தனித்துவ பொருளாதார வலயம், நாட்டின் நிலப்பரப்பை விட 27 மடங்கு பெரியதும், 517,000 சதுர கிலோமீட்டர் பரப்பளவு கொண்டதுமாகும்.

இந்த ட்ரோன்கள் சந்தேகத்திற்கிடமான கப்பல்களைக் கண்காணிப்பது, காணாமல் போன மீனவர்களைக் கண்டறிய உதவுவது, மற்றும் வெள்ளம், புயல் போன்ற இயற்கை சீற்றங்களின் போது உதவி செய்வது போன்ற பணிகளைச் செய்யும்.

சிறிலங்கா விமானப்படை ஒரு பெரிய கடல் பகுதியைக் கண்காணிக்கும் பொறுப்பில் உள்ளது.

வழக்கமான விமானங்களைப் பயன்படுத்தி தொடர்ச்சியான கண்காணிப்பு மேற்கொள்வது மிகவும் செலவு மிக்கது.

எனவே, இந்த ஆளில்லா வான்வழி அமைப்புகளைப் பெற நாங்கள் முன்மொழிகிறோம்.

கொள்வனவு செய்யப்படவுள்ள ட்ரோன்களில் 14 மணி நேரம் வரை பறக்கும் திறன் கொண்ட இரண்டு தண்டர்பி (ThunderB) விமானங்களும், 20 மணி நேரம் வரை பறக்கும் திறன் கொண்ட மற்ற விமானங்களும் அடங்கும்.

இவை குறைந்த நிலப்பரப்பில் செங்குத்தாக அல்லது குறுகிய தூரத்தில்  பறக்கும் திறன் கொண்டதாக இருக்கும்.

இந்த ஒப்பந்தத்தில் செயற்பாட்டுப் பயிற்சி மற்றும் மூன்று ஆண்டுகளுக்கான பராமரிப்பு ஆதரவும் அடங்கும்.

முந்தைய பேச்சுகளின் படி, சிறிலங்கா அரசாங்கம் இரண்டு அலகுகளை மட்டுமே பெறத் திட்டமிடப்பட்டிருந்தது.  திருத்தப்பட்ட இந்த ஏற்பாட்டின்படி நான்கு ட்ரோன்கள் கொள்வனவு செய்யப்படவுள்ளன.

சிறிலங்கா விமானப்படைக்கு உலங்குவானூர்தி பராமரிப்புச் செலவுகளுக்காக ஒதுக்கப்பட்டிருந்த நிதியில் சேமிக்கப்பட்ட தொகையே இதற்காகப் பயன்படுத்தப்படும்.

எனவே, இதற்கென எந்தவொரு கூடுதல் நிதியோ அல்லது புதிய ஒதுக்கீடோ கோரப்படவில்லை.

நாடாளுமன்ற ஒப்புதல் கிடைத்ததும், இந்த ஒப்பந்தம் சட்டமா அதிபர் திணைக்களத்தினால் மீளாய்வு செய்யப்பட்டு அமைச்சரவைக்குச் சமர்ப்பிக்கப்படும்.

டிசம்பர் மாதத்திற்குள் இந்த ஒப்பந்தத்தில் கையெழுத்திட சிறிலங்கா அரசாங்கம் இலக்காகக் கொண்டுள்ளது என்றும் மேஜர் ஜெனரல் அருண ஜயசேகர தெரிவித்துள்ளார்.