அமெரிக்கக் கடற்படையின் ஒஸ்ப்ரே( MV-22B Osprey) ரக விமானம் இன்று பிற்பகல் சிறிலங்காவின் கட்டுநாயக்க பண்டாரநாயக்க அனைத்துலக விமான நிலையத்தை வந்தடைந்தது.

இந்தியப் பெருங்கடலில் சிறிலங்காவுக்கு தெற்கே சுமார் 50 கடல் மைல் தொலைவில் நங்கூரமிட்டுள்ள அமெரிக்கக் கடற்படைக் கப்பலில் இருந்து புறப்பட்ட இந்த விமானம், இன்று பிற்பகல் மீண்டும் அந்தக் கப்பலுக்குத் திரும்பிச் சென்றுள்ளது.

போயிங் நிறுவனத்தால் தயாரிக்கப்பட்ட இந்த விமானம், ஒரு உலங்குவானூர்தி போலவும்,  ஒரு நிலையான இறக்கை விமானமாகவும் செயற்படும் திறன் கொண்டது.

செங்குத்தாகப் புறப்பட்டுத் தரையிறங்கும் திறன்களை, ஒரு வழக்கமான விமானத்தின் வேகம் மற்றும் பயண வரம்புடன் இணைக்கிறது.

உலங்குவானூர்தி பாணியில் செங்குத்தாகப் புறப்பட்டுத் தரையிறங்குவதற்காக இதன் சுழலிகள் மேல்நோக்கியும், ஒரு வழக்கமான விமானமாகச் செயற்படுவதற்காக முன்னோக்கியும் சாய்க்க முடியும். இது, ஒஸ்ப்ரே விமானம் ஒரு வழக்கமான ஓடுபாதையின்றி செயல்பட உதவுகிறது.